काठमाडौँ — उद्यमशीलताको बाटो हुँदै राष्ट्रिय राजनीतिमा प्रवेश गर्ने नयाँ पुस्ताका प्रतिनिधि हुन् - प्रमिला कुलुजु । व्यवसायिक अनुभव समेटेकी उनले अब नीति निर्माण तहसम्म आइपुगेकी छन् । साथै उनी अहिले संसद् प्रवेश गरेकी छन् । राष्ट्रिय स्वतन्त्र पार्टीको आदिवासी जनजातिको प्रतिनिधित्व गर्दै समानुपातिक प्रणालीबाट उनी सांसद बनेकी छन् ।

राष्ट्रिय स्वतन्त्र पार्टी (रास्वपा) स्थापनादेखि नै संगठनमा आबद्ध भएकी कुलुजुको लामो राजनीतिक यात्रा छैन । उनी कुनै राजनीतिक पृष्ठभूमिबाट पनि आएकी होइनन् । देशको अवस्था नजिकबाट बुझ्दै सुधारका लागि प्रत्यक्ष रूपमा राजनीतिमा संलग्न हुनुपर्ने सोच आएकाले उनी यस पार्टीमा आबद्ध भएको बताइन् । राजनीति प्रवेश गर्ने योजनाबारे उनले भनिन्, ‘देश सुधार्न नयाँ पुस्ता अघि बढ्नुपर्छ भन्ने लागेर राजनीतिमा आएको हुँ । राजनीति मार्फत नै समाज र देश सुधार्न सकिन्छ भनेर राजनीतिमा प्रवेश गरेँ ।’

उनी पार्टीको संस्थापन केन्द्रीय सदस्यसहित रास्वपाको महिला विभागकी उपप्रमुख तथा संस्थापक केन्द्रीय सदस्य हुन् । पछिल्लो निर्वाचनमा पार्टीले पाएको उल्लेखनीय मतलाई उनी उत्साहसँगै चुनौतीका रूपमा लिएकी छन् । ‘जनताले पार्टीले केही गर्छ भनेर मत दिएका छन्, त्यो अपेक्षा पूरा गर्नु नै सबैभन्दा ठूलो जिम्मेवारी हो, तर चुनौती पनि उत्तिकै छ,’ उनले भनिन् ।

भक्तपुरको कमलविनायककी उनी आदिवासी समुदायको प्रतिनिधित्व गर्दै संसद्मा पुगेकी हुन् । संसद्मा पुग्दा आफ्नो राजनीतिक यात्रालाई समावेशी र परिणाममुखी बनाउन प्रतिबद्ध रहेको बताइन् । राजनीतिसँगै व्यवसायमा पनि क्रियाशील कुलुजु कपडा व्यवसाय गर्छिन् । उनले ह्यान्डमेड कपडा उत्पादनदेखि ह्यान्डिक्राफ्टको काम गर्दै आएकी छन् । उनी ब्युटिसियन पनि हुन् ।

महिलाहरूलाई सीपमूलक तालिम प्रदान गर्दै रोजगारी सिर्जना गर्ने काममा उनको अग्रसरता छ । महिलाहरूलाई रोजगारी दिने मुख्य उद्देश्य रहेको बताउँदै उनले भनिन्, ‘महिलालाई आत्मनिर्भर बनाउनु मेरो प्राथमिकता हो । आर्थिक सशक्तीकरणमा महिलालाई अगाडि बढाउनु छ ।’