एमाले अध्यक्ष केपी शर्मा ओलीलाई पक्राउ गरेको विरोधमा अनेरास्ववियुका कार्यकर्ताले काठमाडौंको भृकुटीमण्डपमा प्रदर्शन गरेका छन् ।

भदौ २३-२४ को घटनाको निष्पक्ष र न्यायिक छानबिनका लागि भन्दै सर्वोच्च अदालतका बहालवाला न्यायाधीशको अध्यक्षतामा उच्चस्तरीय छानबिन आयोग गठन गर्न एमालेले माग गरेको छ । पार्टी अध्यक्ष केपी शर्मा ओलीको पक्राउपछि आज बिहान केन्द्रीय कार्यालय च्यासलमा बसेको सचिवालय बैठकका निर्णयबारे जानकारी दिँदै महासचिव शंकर पोखरेलले पक्राउको विरोधमा आजैदेखि प्रतिवाद सुरु हुने बताए ।

एमाले अध्यक्ष केपी शर्मा ओली पक्राउको विरोधमा पार्टीले कानुनी तथा राजनीतिक रुपमा प्रतिवाद गर्ने भएको छ । आज बिहान पार्टी मुख्यालय च्यासलमा बसेको सचिवालय बैठकले यस्तो निर्णय गरेको हो ।प्रत्येक जिल्ला सदरमुकाममा आज अपराह्न ३ बजे जनसंगठनहरूको तर्फबाट विरोध प्रदर्शन गर्ने, भोलि १२ बजे जिल्ला पार्टी कमिटीको आयोजनामा प्रदर्शनसहित प्रमुख जिल्ला अधिकारी कार्यालयमा विरोधपत्र बुझाउने भएको छ । यस्तै, लोकतन्त्र र कानुनी राज्यका पक्षधर सबै दलसँग संवाद र सहकार्य तथा नागरिक समाज र आम जनसमुदायसँग सहकार्य गर्ने बैठकले निर्णय गरेको पार्टी सचिव महेश बस्नेतले जानकारी गराए ।

एमाले अध्यक्ष केपी शर्मा ओलीलाई त्रिवि शिक्षण अस्पताल महाराजगन्जमा भर्ना गरिएको छ । उनलाई अस्पतालको 'एनेक्स वान' भवनको बेडमा भर्ना गरिएको हो । ओली शनिबार बिहान पक्राउ परेपछि स्वास्थ्य परीक्षणका लागि अस्पताल लगिएको थियो ।

नेकपा एमालेका अध्यक्ष तथा पूर्व प्रधानमन्त्री केपी शर्मा ओलीको पक्राउविरुद्ध नेता कार्यकर्ताहरु सडकमा उत्रिएका छन् । यता पार्टी कार्यालय च्यासलमा सचिवालय बैठक चलिरहँदा काठमाडौं जिल्ला कमिटीको आयोजनामा चाबहिल चोकबाट प्रदर्शन सुरु भएको छ । जेन–जी आन्दोलनमा दमन गरिएको भन्दै गौरीबहादुर कार्की आयोगले कारबाहीका लागि गरेको सिफारिस अनुसार सरकारले शनिबार बिहानै अध्यक्ष ओलीलाई निवासबाटै नियन्त्रणमा लिएको छ । यस्तै पूर्व गृहमन्त्री रमेश लेखकलाई पनि पक्राउ गरिएको छ ।

नेकपा एमालेको सचिवालय बैठक पार्टी कार्यालय च्यासलमा सुरु भएको छ । अध्यक्ष केपी शर्मा ओली पक्राउ परेपछि एमालेले त्यसको प्रतिवादका लागि योजना बनाउन सचिवालय बैठक बोलाएको हो । बैठकका लागि बिहान साढे ८ बजे नै नेताहरु पार्टी कार्यालय पुगिसकेका थिए । एमालेले सरकारको उक्त कदमविरुद्ध प्रतिवाद गर्ने जनाएको छ । कसरी अगाडि जाने भन्ने विषयमा छलफल भइरहेको एमाले सचिवालय स्रोतले जनाएको छ । 

एमाले अध्यक्ष केपी शर्मा ओली पक्राउ परेपछि यसबारे छलफल गर्न बोलाइएको सचिवालय बैठकका लागि नेताहरू केन्द्रीय कार्यालय च्यासलमा आउने क्रम सुरु भएको छ। उपाध्यक्ष पृथ्वीसुब्बा गुरुङ र सचिव महेश बस्नेत भर्खरै आइपुगेका छन्।

जेन–जी आन्दोलन दबाएको आरोपमा पक्राउ परेका पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकमाथि अनुसन्धान सुरु हुनेछ।

त्यसका लागि प्रहरीले सर्वप्रथम अदालतबाट अनुमति लिनुपर्ने हुन्छ, तर आज सार्वजनिक बिदा भएकाले आइतबार मात्रै अदालतमा पेस गरिनेछ।

अदालतमा पेस गर्नुअघि आज उनीहरूलाई न्यायिक हिरासतमा राखिनेछ।

न्यायिक हिरासतमा प्रहरीले २३ र २४ को घटनाबारे सोधपुछ र बयान गर्नेछ। उनीहरूमाथि कार्की नेतृत्वको आयोगले दिएको प्रतिवेदनलाई आधार मानेर बयान गरिनेछ।

त्यही बयानका आधारमा जिल्ला सरकारी वकिल हुँदै जिल्ला अदालतमा कार्की आयोगले सिफारिस गरेको अभियोग वा थप अभयोगमा उनीहरूविरुद्ध मुद्दा दर्ता हुनेछ।

नेकपा एमालेका महासचिव शंकर पोखरेलले जेन–आन्दोनमा दमन गरेको आरोपमा कार्की आयोगको सिफारिसमा पक्राउ परेका पूर्व प्रधानमन्त्री तथा पार्टी अध्यक्ष केपी शर्मा ओलीलाई तत्काल रिहा गर्न माग गरेका छन् । केही बेरअघि सामाजिक सञ्जालमा पक्राउको विरोध गर्दै उनले सरकारको यो कदम पूर्वाग्रह र प्रतिशोधपूर्ण रहेको आरोप लगाएका छन् । साथै उनले यो प्रतिशको मूल्य धेरै महँगो पर्ने चेतावनीसमेत दिएका छन् । उनले भनेका छन्, ‘पूर्वाग्रह र प्रतिशोधको मूल्य धेरै महँगो हुन्छ। जिम्मेवार बन, अविलम्ब रिहा गर !’

तस्बिर : अंगद ढकाल/कान्तिपुर

जेन–आन्दोलनमा प्रदर्शनकारीविरुद्ध दमन गरेको विषयमा गौरीबहादुर कार्की आयोगले कारबाही सिफारिस गरेका आधारमा पक्राउ परेका पूर्व प्रधानमन्त्री केपी शर्मा ओली र पूर्व गृहमन्त्री रमेश लेखेकलाई स्वास्थ्य परीक्षणका लागि लगिँदैछ । प्रहरी परिसरका एक जना अधिकारीले दुवै जनालाई मेडिकल टेस्टका लागि लैजान लागिएको जानकारी दिए । अनुसन्धान सुरु गर्नुअघि अनिवार्य रुपमा स्वास्थ्य परीक्षण गराउनुपर्ने कानुनी व्यवस्ता रहेको छ । दुवै जनालाई प्रहरीले शनिबार बिहानै निवासबाट पक्राउ गरेको थियो । 

पूर्वगृहमन्त्री रमेश लेखकले सरकारले आफूमाथि राजनीतिक प्रतिशोधेको बताएका छन्। ‘सरकारको यो राजनीतिक पूर्वाग्रह हो, यसको राजनीतिक र कानुनी लडाइँ लड्छु,’ लेखकले कान्तिपुरसँग भने।

एमालेले अध्यक्ष केपी शर्मा ओली पक्राउ परेको घटनाबारे छलफल गर्न सचिवालय बैठक बोलाएको छ।

एमाले सचिव महेश बस्नेतले सचिवालय बैठकले ओली पक्राउबिरुद्ध बिरोधका कार्यक्रम बनाउने जानकारी दिएका छन् ।