लमजुङ — प्रतिनिधिसभा सदस्य निर्वाचनअन्तर्गत समानुपातिक प्रणालीतर्फ लमजुङको अन्तिम मतपरिणाम अनुसार राष्ट्रिय स्वतन्त्र पार्टी (रास्वपा) दोब्बर बढी मतसहित पहिलो स्थानमा रहेको छ ।

कुल १ लाख ३८ हजार २ सय ५२ मतदाता रहेकोमा ७६ हजार २ सय ८९ मत खसेको थियो । खसेको मतमध्ये ७४ हजार ३३७ मत सदर भएका छन् । १ हजार ९ सय ५२ मत बदर भएका छन् ।

मुख्य निर्वाचन अधिकृतको कार्यालयका अनुसार सोमबार दिउँसो सम्पन्न मत परिणाम अनुसार रास्वपाले चुनाव चिन्ह घण्टीमा ३४ हजार ५ सय ७५ मत प्राप्त गर्दै पहिलो स्थान हासिल गरेको छ ।

दोस्रो स्थानमा नेपाल कम्युनिष्ट पार्टी (एमाले) ले सूर्य चिन्हमा १५ हजार ८ सय ४९ मत प्राप्त गरेको छ । नेपाली कांग्रेसले रुख चिन्हमा १५ हजार ६ सय २ मत प्राप्त गर्दै तेस्रो स्थानमा सीमित भएको छ । प्रत्यक्षतर्फ रास्वपा उम्मेदवार दोब्बर बढी मतसहित विजयी भएका थिए भने एमाले र कांग्रेस उम्मेदारले क्रमशः दोस्रो र तेस्रो स्थानमा रहेका थिए ।