स्थायी र अस्थायी ७० वटै मतदान केन्द्रबाट मतपेटिका संकलन गरी मुख्य निर्वाचन अधिकृतको कार्यालय दुनैमा ल्याइएको प्रमुख जिल्ला अधिकारी जुनु हमालले जानकारी दिइन् ।
डोल्पा — डोल्पाका सबै मतदान केन्द्रबाट मतपेटिका ढुवानी सकिएको छ । जिल्लाका स्थायी र अस्थायी ७० वटै मतदान केन्द्रबाट मतपेटिका संकलन गरी मुख्य निर्वाचन अधिकृतको कार्यालय दुनैमा ल्याइएको प्रमुख जिल्ला अधिकारी जुनु हमालले जानकारी दिइन् ।
उपल्लो डोल्पाका २३ मतदान केन्द्रबाट मतपेटिका ल्याउनका लागि पाँचवटा हेलिकोप्टर प्रयोग गरिएको थियो । भौगोलिक रूपमा अत्यन्तै विकट तथा सडक सञ्जालको पहुँचबाहिर रहेका उपल्लो डोल्पाका मतदान केन्द्रबाट शुक्रबार दिनभर हेलिकोप्टरमार्फत मतपेटिका सदरमुकाम ल्याइएको प्रजिअ हमालले बताइन् ।
मतपेटिका संकलन सम्पन्न भइसकेकाले मतगणना गर्न सर्वदलीय बैठक बस्ने तयारी गरिएको मुख्य निर्वाचन अधिकृतको कार्यालयले जनाएको छ । 'सर्वदलीय बैठकले निर्णय गरेसँगै मतगणना सुरु हुनेछ,' उनले भनिन् ।
