काठमाडौँ — प्रतिनिधिसभाका १६५ निर्वाचन क्षेत्रमध्ये शुक्रबार साँझ ६ बजेसम्म हिमाली जिल्लाका आठ वटा निर्वाचन क्षेत्रको मतगणना सुरु भएको छैन ।

मतपेटिका संकलनको काम जारी रहेकाले कोशी, गण्डकी, कर्णाली र सुदूरपश्चिमका हिमाली जिल्लाका आठ वटा निर्वाचन क्षेत्रमा मतगणना हुन नसकेको हो । 

कोशी प्रदेशमा संखुवासभा र सोलुखुम्बुको मतगणना सुरु भएको छैन । संखुवासभास्थित भोटखोला गाउँपालिकाको थुदाम मतदान केन्द्रको मतपेटिका शनिबार मात्रै ल्याइने भएको छ । खराब मौसमका कारण सदरमुकाम ल्याउन नसक्दा मतगणना अझै हुन सकेको छैन । थुदाममा १३ मत मात्रै खसेको छ । त्यहाँ ६३ मतदाता थिए ।

सेनाको हेलिकोप्टरले शुक्रबार पटकपटक मतपेटिका ल्याउने प्रयास गरे पनि खराब मौसमका कारण ल्याउन सकेको छैन । भौगोलिक रूपमा विकट मानिएका भोटखोलाका तीन, भोटखोला गाउँपालिकाको रिदाक र किमाथांका तथा सिलिचोङ गाउँपालिका–५ का काम्पेक र गौथलाका मतपेटिका ल्याइएको डिएसपी कुमारप्रसाद मैनालीले बताए ।

पटकपटक मतपेटिका ल्याउने प्रयास गरे पनि थुदाममा पानी परिरहेकाले ल्याउन नसकिएको उनले बताए । सेनाको हेलिकोप्टर मतदान केन्द्रमा अवतरण हुन नसकेको खाँदबारीमा रहेको सेनाको ईन्द्रदल गुल्मले जनाएको छ।  जिल्लाका १ सय २४ मतदान केन्द्रको पैदल मार्गबाट मतपेटिका गणनास्थल ल्याइसकिएको छ । जिल्लामा एक अस्थायीसहित १६५ मतदान केन्द्र छन् ।

सोलुखुम्बुका १३९ वटै मतदान केन्द्रका मतपेटिका संकलन सकिए पनि मतगणना सुरु भएको छैन । 
केही बेरअघि बसेको सवर्दलीय बैठकले शुक्रबार साँझ ७ बजेदेखि मतगणना सुरु गर्ने निर्णय गरेको छ ।

गोरखा क्षेत्र नम्बर १ खराब मौसमका कारण मतपेटिका संकलनमा ढिलाइ भएपछि मतगणना सुरु हुन सकेको छैन। शुक्रबार अपरान्ह ५ बजेसम्म उत्तरी गोरखा २३ मध्ये ९ वटा मतदान केन्द्रको मतपेटिका संकलन भएको छ । 
शुक्रबार दिउँसो चुमनुब्री–१ का दुई वटा मतदान केन्द्रको मतपेटिका बोकेको सेनाको हेलिकप्टर पोखरामा अवतरण भएको थियो । केहीबेर पोखरामा बसेर सेनाको हेलिकप्टर गोरखाका लागि उडेको थियो । पोखराबाट उडेको हेलिकप्टर गोरखामा अवतरण भएको जिल्ला प्रहरी कार्यालय गोरखाका डिएसपी राजकुमार श्रेष्ठले बताए । 

कर्णालीका हिमाली जिल्ला डोल्पा, हुम्ला र मुगुमा पनि शुक्रबार साँझसम्म मतगणना सुरु हुन सकेको छैन । हुम्लामा शुक्रबार साँझ पौने ८ बजेदेखि मतगणना हुने भएको छ । मतपेटिका संकलनपछि सम्पन्न सर्वदलीय बैठकले साँझ ७ः४५ बजेदेखि मतगणना गर्ने निर्णय गरेको मुख्य मतदान अधिकृत नीलकण्ठ बरालले बताए । ‘मतपेटिका संकलन भइसक्यो, सर्वदलीय बैठक बसेर आजै ७ः४५ बजेदेखि मतगणना सुरु गर्ने निर्णय गरेका छौं,’ उनले भने । हुम्लामा ६५.३६ प्रतिशत मतदान भएको छ । कुल ३४ हजार ३ सय ७२ मतदाता रहेको हुम्लामा २२ हजार ४ सय ६७ मत खसेको मुख्य निर्वाचन अधिकृतको कार्यालयले जनाएको छ ।