काठमाडौँ — निर्वाचन नजिकिँदै गर्दा एमाले अध्यक्ष केपी शर्मा ओलीले देश पहिले भन्ने भावनाका साथ पार्टीको पक्षमा मतदानका लागि भिडियोमार्फत आहृवान गरेका छन् । भदौ २४ मा सिंहदबार, सर्वोच्च अदालत, संसद् भवन, प्रहरी चौकी जल्दा सपना पनि जलेको भन्दै जीवनका उत्तरार्धमा चुनावी प्रतिस्पर्धा गरिरहेको बताउँदै देश र संविधानको रक्षाका लागि आफ्नो दललाई मत दिन आग्रह गरेका छन् ।

‘मैले राष्ट्रको पक्षमा निर्णय गरे भन्ने आत्मसन्तुष्टि तपाईंमा रहिरहोस् । यसै पनि मेरा त बाँच्ने दिन, बाँचिसकेका दिनभन्दा कम छन् । तर म बाँच्ने दिन बाँचिसकेका दिनभन्दा बढी भएकाहरुका लागि लड्दै छु । त्यसैले मैले देश पहिले भन्दै आएको छु । अब तपाईंले पनि देश पहिले भन्ने दिन आएको छ,’ उनको भनाइ छ, ‘देश पहिले भनेको संविधान र नियम पहिले भनेको हो । देश पहिले भनेको भूमि र जनता पहिले भनेको हो । र, देश पहिले भनेको संविधान र नियम पहिले भनेको हो । संविधान बचे मात्र तपाईंको अधिकार बच्छ ।’

निर्वाचनबाट संविधानको रक्षा गर्ने ग्यारेन्टी चाहिएको उनको भनाइ छ । ‘बोल्ने अधिकार, बाँच्ने अधिकार, न्याय पाउने अधिकार र आफ्नो मतको अधिकार । आज हामीलाई संविधान नहल्लिने, नियम नमिच्ने र अधिकार नकुल्चिने ग्यारेन्टी चाहिएको छ । त्यस ग्यारेन्टीको लागि आज देश पहिले भन्ने भावना चाहिएको छ,’ ओलीको थप भनाइ छ, ‘देश पहिले भनेको सार्वजनिक सम्पत्ति पहिले भनेको हो । सिंहदरबार अदालत संसद्, सडक सरकारी कार्यालय प्रहरी चौकी सुरक्षा निकाय यी सबै तपाईंको कर र भरोसाले बनेका हुन् । यी जल्दा तपाईंको भरोसा मात्र होइन, तपाईंको सपना पनि जल्छ, जलेको छ । आज हामीलाई अब यी कहिले नजल्ने ग्यारेन्टी चाहिएको छ ।’