बारा — कांग्रेस सभापति गगन थापाले शनिबार बाराको निर्वाचन क्षेत्र नम्बर १ को कोल्हवीमा चुनावी सभालाई सम्बोधन गरे । सोही क्रममा तत्कालीन माओवादीबाट २०७९ मा आदर्शकोतवाल गाउँपालिकामा अध्यक्षका प्रत्यासी अताउल अन्सारी र उनका केही समर्थकलाई पार्टी प्रवेश गराए । ‘प्रवेशले मलाई ऊर्जा मिलेको छ,’ नवप्रवेशी अन्सारीले भने । उनको प्रवेशले उक्त क्षेत्रका कांग्रेस उम्मेदवार शम्भुबहादुर बुढाथोकीलाई बल पुगेको छ । 

अन्सारीले त्यतिबेला १ हजार ८ सय ४० मत पाएका थिए । त्यसैले दक्षिणी क्षेत्रमा उनको मतको ‘ग्राफ’ बढ्न सक्ने आशमा बुढाथोकी हौसिएका हुन् भने नेकपाका उम्मेदवार सन्तोष दंगाल दबाबमा परेको देखिन्छन् । नेकपाका अन्सारीको प्रवेशले आफ्नो जितका लागि आधार बनेको उम्मेदवार बुढाथोकीले बताए । यसैगरी नेकपाका उम्मेदवार दंगालले अन्सारीले पार्टी छोडे पनि आफूलाई खासै असर गर्न नसक्ने दाबी गरे । 

निर्वाचन क्षेत्र नम्बर २ का जसपा नेपालका तत्कालीन जिल्ला अध्यक्ष धरमवीर यादव राष्ट्रिय स्वतन्त्र पार्टी प्रवेश गरेका छन् । झापा पुगेर पार्टीका वरिष्ठ नेता बालेन्द्र शाहसित भेटघाट गरेर आफ्ना समर्थक र जसपाका तत्कालीन कैयन् कार्यकर्तासहित उनी पार्टी प्रवेश गरेका हुन् । २०८२ वैशाखमा जसपाको जिल्ला अधिवेशन हुँदा यादव दोस्रो कार्यकालका लागि चुनावी मैदानमा थिए । तर उनी रमेश यादवसित पराजित भए ।

यादवले यस क्षेत्रको तत्कालीन संघीय सांसद तथा बहालवाला उपराष्ट्रपति रामसहाय यादवलाई जिताउनमा सक्रिय भूमिका निर्वाह गरेका थिए । रामहसहाय उपराष्ट्रपति भएपछि उपचुनावमा पार्टी अध्यक्ष उपेन्द्र यादव लोकतान्त्रिक गठबन्धनबाट उठेपछि उनलाई समेत जिताउन उनी सक्रिय थिए । उनको रास्वपा प्रवेशले कतिपय कार्यकर्ता छिन्नभिन्न भए । उनको रास्वपा प्रवेशले तत्कालीन लोसपाबाट देवताल गाउँपालिकाका अध्यक्षसमेत भइसकेका रास्वपाका नवप्रवेशी यसै क्षेत्रका रास्वपा उम्मेदवार चन्दन सिंहले आफूलाई सहज महसुस गरेका छन् । लोसपाका केन्द्रीय नेता श्याम गुप्तासमेत रास्वपा प्रवेश गरेका छन् ।

रास्वपा उम्मेदवार सिंहले भने, ‘धरमवीरको प्रवेश र मलाई समर्थनले बलियो जनाधार तयार भएको छ ।’ यसै क्षेत्रका जसपा नेपालका उम्मेदवार रामकिशोर यादवले आफूलाई त्यसले फरक नपर्ने बताए । धरमवीरले पार्टी नेतृत्वको काखापाखा रवैयाले आफू रास्वपामा प्रवेश गरेको बताए ।

चुनावी दौरान र चुनाव नजिकिँदै गर्दा राजनीतिक दल हेरफेर गर्ने यी दुवै पात्र जिल्लाका ४ वटै क्षेत्रमध्येका उदाहरण हुन् । उनीहरूजस्ता धेरैले दल हेरफेर गरेर कोही यता त कोही उता भएका छन् । दल हेरफेर र नेता कार्यकर्ता यताउति भएपछि कोही उम्मेदवारले सहज महसुस गरी हौसिरहेका छन् भने कोही उम्मेदवार दबाबमा परिरहेका छन् । हेरफेरले मतदातामा सहज र चुनौती देखिएको छ । 

जिल्लामा दल हेरफेरसँगै फरक पार्टी प्रवेशको लहरले कडा र रोचक प्रतिस्पर्धा भइरहेको छ । कहिले यता र कहिले उता गर्दा प्रतिस्पर्धा रोचक भइरहेको हो । ग्रासरुटमा हेरफेरले मतको ग्राफ घटबढ भइरहेको त्यस क्षेत्रका मतदाताले बताए । कार्यकर्ता सम्हाल्दै आन्तिरक रूपमा निराश बनिरहेका छन् । पार्टीको एक्लो र गठबन्धनबिना खर्च व्यवस्थापन गर्नसमेत अप्ठयारो भइरहेको छ । जित्ने दाउमा रहेकाहरूले प्रलोभन दिएर तानिरहेका छन् । कार्यकर्ता र नेताहरूको तानातान चलिरहेको छ । 

आफ्नै दलभित्रबाट चुनौती

जिल्लाको कोल्हवी र प्रसौनीमा कांग्रेस सभापति गगन थापाको चुनावी सभाको क्रममा पार्टीका तत्कालीन सहमहामन्त्री उमाकान्त चौधरीसहित पार्टीका जिल्ला अध्यक्ष राजेश रायको उपस्थिति देखिएन । चौधरीको कोल्हवी क्षेत्रमा आफ्नो समुदायमा बलियो पकड मानिन्छ । चौधरी र यादव दुवै देउवा पक्षीय हुन् । चौधरीको क्षेत्र नम्बर १ बाट नामसमेत सिफारिस भएको थियो । तर उनले टिकट पाएनन् । उनी यस क्षेत्रबाट पटक–पटक जितेर मन्त्रीसमेत भइसकेका हुन् । उनले टिकट नपाएर भित्री रूपमा असन्तुष्ट रहेको उनी निकटका कार्यकर्ता बताउँछन् । विशेष महाधिवेशनले पार्टीभित्रको किचलो भएपछि कतिपय नेता–कार्यकर्ता असन्तुष्ट छन् ।

यसैगरी जिल्ला पार्टी सभापति यादवका पिता राधेचन्द यादव (पार्टीका तत्कालीन केन्द्रीय सदस्य)लाई क्षेत्र नम्बर २ बाट विशेष महाधिवेशनअघि एकल नाम सिफारिस भए पनि उनले टिकट नपाएपछि उनका परिवार असन्तुष्ट छन् । राधेचन्दको पनि कहीँकतै उपस्थिति देखिएन । नेकपा एमालेमा पनि यो प्रवृत्ति भित्री रूपमा देखिएको छ । पार्टीको महाधिवेशनपछि नेताहरूमा चिसोपन बढेपछि उम्मेदवारमा हौसिएको वातावरणमा कमी देखिएको छ ।