रुकुम पूर्व — नेपाली कम्युनिष्ट पार्टीका संयोजक पुष्पकमल दाहालले ३१औं जनयुद्ध दिवसका अवसरमा रुकुम पूर्वबाट शुभकामना दिँदै जनयुद्धका स्मृतिहरू ताजा भएको बताएका छन् ।

‘यस वर्षको जनयुद्ध दिवस मेरो लागि विशेष छ। रुकुम पूर्वमा आएर जनयुद्ध मनाउँदै गर्दा जनयुद्धका ती सबै स्मरणहरू ताजा भएर आएका छन्,’ उनले भने, ‘जनयुद्धमा यहाँका जनताको उत्प्रेरणाबाट नै हामीले ऊर्जा पाएका थियौं ।’

उनले संघीय लोकतान्त्रिक गणतन्त्र स्थापनामा गरिब, महिला तथा आदिवासी जनजातिको योगदान निर्णायक रहेको उल्लेख गरे । ‘यहाँका गरिब, महिला, आदिवासी जनजातिले रगत नबगाएको भए हामी आज समावेशी र समानुपातिक गणतन्त्रमा हुने थिएनौं,’ उनले भने, ‘म यहाँ आउँदा अलिकति भावुक र उद्वेलित भएको छु।जनयुद्धको जस्तै उत्प्रेरणा र नयाँ ऊर्जा सहित अब अघि बढ्ने छौं ।’