काठमाडौँ — प्रतिनिधिसभा सदस्य निर्वाचनका लागि उपेन्द्र यादव नेतृत्वको जनता समाजवादी पार्टी (जसपा) नेपालले चुनावी घोषणापत्र ल्याएको छ ।

घोषणापत्रमा पार्टीले संविधान स‌ंशोधन र पुनर्लेखनलाई मुख्य एजेण्डा बनाएको छ । जसपाले अहिलेको संविधानले समावेशी तथा सामाजिक लोकतन्त्रको आधारभूत मान्यताहरूलाई आत्मसाथ गर्न नसकेको भनेको छ ।

प्रशासनिक संघीयताको पक्षपोषण गरेकोले संविधान विज्ञहरू सम्मिलित उच्चस्तरीय संविधान पुनरावलोकन आयोग गठन हुनुपर्ने र त्यसले दिने सुझावको आधारमा संशोधन/परिमार्जन तथा पुनर्लेखन गर्नुपर्ने घोषणापत्रमा उल्लेख छ । 

शुक्रबार काठमाडौंमा आयोजित कार्यक्रममा जसपा नेपालले चुनावी घोषणापत्र सार्वजनिक गरेको हो । 

जसपा नेपालले ‘संघर्षसँगै समृद्धि’ नारा दिएको छ । ‘जसपा नेपाल यो घोषणापत्रमार्फत यस्तो राज्य मोडल चाहन्छ– जहाँ राज्यको उद्देश्य नागरिकलाई गुणस्तरीय सेवा प्रदान गर्नु हो,’ घोषणापत्रमा भनिएको छ ।