पर्वत — जिल्लामा मुलुकका दुई ठूला दलका केन्द्रीय सदस्यबीच लगातार तेस्रोपटक प्रतिस्पर्धा भइरहेको छ । कांग्रेसका अर्जुनप्रसाद जोशी र एमालेका पदम गिरी यसपटक पनि पर्वतमा मुख्य प्रतिस्पर्धी बनेका छन् ।

दुईपटक पराजय बेहोरेका जोशी र जितको ह्याट्रिक गर्ने लक्ष्यसहित मैदानमा उत्रिएका गिरीबीचको प्रतिस्पर्धा रोचक हुने अनुमान छ । यी दुईलाई नेपाली कम्युनिस्ट पार्टीका केन्द्रीय सदस्य मनहरि तिमल्सिना र राष्ट्रिय स्वतन्त्र पार्टीका उम्मेदवार सागर भुसालले चुनौती दिइरहेका छन् । 

एमालेका गिरीले यसपटक पनि विजयी हुने दाबी गरेका छन् । गत माघ ६ गते उम्मेदवारी दर्ताका क्रममा उनले भने, ‘चार हजारभन्दा कम मतान्तरको जितलाई जित नै मान्दिनँ ।’ उनको आत्मविश्वासलाई अन्य दलका उम्मेदवारले दम्भका रूपमा लिएका लिएका छन् । जिल्लामा उम्मेदवारले घरदैलो अभियान तीव्र बनाएका छन् । कांग्रेसका जोशीले कुश्मा–१०, पिपलटारीबाट बुधबारदेखि अभियान सुरु गरेका हुन् । जिल्लामा कम्युनिस्ट आन्दोलनका संस्थापक गणेश शर्मा पौडेलकी पत्नी ८१ वर्षीया गुमादेवीबाट आशीर्वाद लिएर उनले अभियानको सुरुआत गरेका थिए ।

‘यसपटक अन्तिम पटक’ भन्दै जोशीले मत मागिरहेका छन् । पटक–पटक उम्मेदवार बनेको भन्दै कांग्रेसभित्रबाट आलोचना खेप्दै आएका उनले आगामी निर्वाचनमा नउठ्ने घोषणा पनि गरेका छन् । शेरबहादुर देउवा समूहमा रहेका जोशी विशेष महाधिवेशनबाट सभापति गगन थापा पक्षमा खुलेका थिए । 

दुईपटक संविधानसभा र एकपटक प्रतिनिधिसभा सदस्य हुँदा आफूले सडक, खानेपानी, बिजुली र भवनलगायत भौतिक पूर्वाधारमा उल्लेख्य काम गरेको दाबी गर्दै जोशीले भने, ‘जनताको दुःख–सुखमा प्रत्यक्ष सहभागी हुन नपाएकामा पछुतो छ । म पहिलेको अर्जुन जोशी हैन, बदलिएर आएको छु । अन्तिम मौका दिनुहोस् ।’

जोशी ०५६ सालमा पर्वत–१ बाट प्रतिनिधिसभा सदस्यमा निर्वाचित भएका थिए । ०६४ र ०७० सालको संविधानसभा निर्वाचनमा पनि लगातार विजयी भएका थिए । ०७४ र ०७९ को निर्वाचनमा भने एमालेका गिरीसँग पराजित भए । २०३४ सालबाट कांग्रेस सदस्य रहेका उनले ०४८ सालबाट १६ वर्षसम्म जिल्ला सभापति भएर नेतृत्व गरेका थिए ।

एमाले उम्मेदवार गिरी यसपटक पनि फराकिलो मतान्तरले चुनाव जित्ने दाबी गर्दै आएका छन् । आठ वर्ष सांसद र केही महिना मन्त्री भएर जिल्लाको विकासमा उल्लेख्य काम गरेकाले आफूलाई हार्ने छुट नरहेको उनले बताए । ‘१० वर्षअघि र अहिलेको पर्वत तुलना गरेर हेरे पुग्छ,’ उनले भने, ‘नाङ्गो आँखाले देख्ने गरी गाउँ–गाउँमा विकास पुर्‍याएका छौं ।’

युवा उमेरमै पार्टीभित्रका वरिष्ठ नेतालाई पन्छाउँदै प्रभाव जमाउन सफल भएका छन् । राष्ट्रियसभाका पूर्वअध्यक्ष गणेश तिमिल्सिना र संविधानसभा सदस्य तथा पूर्व प्रदेश मन्त्री विकास लम्साल अहिले राजनीतिमा निष्क्रियजस्तै देखिन्छन् । १५ वर्षअघि पार्टीको जिल्ला अध्यक्ष बनेका गिरीले त्यसयता राजनीतिमा निरन्तर सफलता हात पारेका छन् । दुइपटक सांसद, मन्त्री, प्रमुख सचेतक तथा केन्द्रीय सदस्य भइसकेका छन् । २०६२ सालमा पृथ्वीनारायण क्याम्पसको स्ववियु सभापति बनेसँगै गिरीको राजनीतिक यात्रा औपचारिक रूपमा सुरु भएको थियो ।

०७४ को निर्वाचनमा गिरीले जोशीलाई १२ हजार ४ सय ५६ मतान्तरले पराजित गरेका थिए । गिरीले ३९ हजार २ सय ७५ मत ल्याउँदा जोशीले २६ हजार ८ सय १९ मत प्राप्त गरेका थिए । त्यसबेला एमाले–माओवादी गठबन्धन थियो । ०७९ को निर्वाचनमा गिरीले जोशीलाई पराजित गरे । गिरीले २९ हजार ८ सय ७२ मत ल्याउँदा जोशीले २७ हजार ६ सय ९ मत प्राप्त गरेका थिए । 

जिल्लामा नेकपा र रास्वपाका उम्मेदवारको क्रेज पनि ह्वात्तै बढेको छ । नेकपाका तिमिल्सिना युवा तथा बौद्धिक उम्मेदवारका रूपमा चिनिन्छन् । तत्कालीन माओवादी युद्धमा सहभागी भएका तिमिल्सिना ०५८ देखि २०५९ सालसम्म नेपाली सेनाको हिरासतमा बसेका थिए । उनी ०७२ देखि ०७३ सालसम्म तत्कालीन प्रधानमन्त्री पुष्पकमल दाहालको प्रेस सल्लाहकारको भूमिकामा थिए ।

लामो समय पत्रकारिता र लेखनमा सक्रिय रहेका उनले जिल्लाको विकासमा आफूले पहिल्यैदेखि योगदान दिँदै आएको दाबी गरे । प्रधानमन्त्री दाहालसँग प्रत्यक्ष पहुँच बनाएका तिमिल्सिनाले आफूलाई मत दिने मतदाता कहिल्यै पछुताउन नपर्ने बताउँछन् । ‘मैले कसैलाई पनि राजनीतिक पूर्वाग्रहको चस्माबाट हेर्ने छैन,’ उनले भने, ‘पर्वतको समग्र विकासका लागि मेरै नेतृत्वमा एक सय जना विज्ञसहितको टोलीले विस्तृत मार्गचित्र तयार गरेको छ ।’ 

रास्वपाले भुसाललाई उम्मेदवार बनाएको छ । लामो समय इजरायलमा बसेर फर्किएका भुसाल अहिले पोखरामा होटल व्यवसाय गरिरहेका छन् । पूर्वकांग्रेस पृष्ठभूमिका भुसाल रास्वपा जिल्ला सचिवसमेत हुन् । भुसाल परिवर्तनको माग बलियो भएकाले आफ्नो जित सुनिश्चित रहेको दाबी गर्छन् । ‘३६ वर्षसम्म पुराना दलले राज्य चलाउँदा बेथिति र भ्रष्टाचारबाहेक केही भएन,’ उनले भने, ‘सबै दल परीक्षण भइसकेकाले मतदाताले मलाई रोज्नेमा म विश्वस्त छु ।’ उनले रास्वपाले सरकार बनाएर जनहितमा काम नगरे पुनः जनतासँग मत माग्न नआउने प्रतिबद्धतासमेत व्यक्त गरेका छन् ।