रामेछाप — आउँदो फागुन २१ मा हुने प्रतिनिधिसभा निर्वाचनको रौनकले रामेछाप नगरपालिका–७, सुकाजोरका डम्बरबहादुर कार्कीलाई खासै छोएको छैन । उमेरले ८४ वर्ष नाघिसकेका कार्की २००७ सालपछिका राजनीतिक परिवर्तनका प्रत्यक्ष साक्षी हुन् । पटक–पटक भएका निर्वाचनमा भोट हालेको अनुभव भए पनि यसपटक उनीभित्र न उत्साह छ, न आशा नै ।

'यो निर्वाचनले केही हुनेवाला छैन,' कार्की भन्छन्, 'उही रमाइलो मात्रै हो । नेताहरू यो गर्छु, त्यो गर्छु भनेर भोट माग्न आउँछन् । जितेर गएपछि काम शून्य हुन्छ । आफ्नो दुःख आफ्नैसँग छ । जो आए पनि केही हुनेवाला छैन ।'

२००७ सालपछिका हरेक निर्वाचनमा सहभागी भए पनि भोट माग्न आउने नेताहरूले गरेका प्रतिबद्धता व्यवहारमा नउतारेको उनको गुनासो छ । नेताहरूको जीवनशैलीमा आमूल परिवर्तन आएको देखिए पनि आम नागरिकको जीवन भने उस्तै अवस्थामा रहेको कार्की बताउँछन् ।

रामेछाप नगरपालिका–७ कै युवा सचिन महतारा भने यो निर्वाचनलाई लिएर निकै उत्साहित छन् । आगामी फागुन २१ मा हुने प्रतिनिधिसभा निर्वाचनमा उनी पहिलो पटक मताधिकार प्रयोग गर्दै छन् । यसअघिका निर्वाचनका बेला रोजगारीका सिलसिलामा विदेशमा रहेका महतारा यसपटक भने राम्रो एजेन्डा बोकेका र युवा उम्मेदवारलाई मत दिनकै लागि स्वदेश फर्किएकाे बताए ।

'पहिला पनि निर्वाचन हुन्थे, तर कहिले भोट हाल्ने चाहना जागेन, धेरै समय विदेशमै थिएँ,' उनी भन्छन्, 'अब भने पुरानाभन्दा नयाँ र युवालाई जिताउन मेरो मत हुनेछ ।' पुराना पार्टी र पटक–पटक दोहोरिएका उम्मेदवारलाई होइन, यसपटक नयाँ पार्टी र युवा नेतृत्वलाई निर्वाचित गराएर देश विकासको अवसर दिनुपर्नेमा उनको जोड छ । 'युवाले नेतृत्व पाए मात्र देशमा परिवर्तन सम्भव छ । अबको निर्वाचन पुराना अभ्यास तोड्ने अवसर पनि हो,' उनले भने ।

मन्थली नगरपालिका–९, पुरानागाउँकी ५० वर्षीया तारादेवी श्रेष्ठलाई अहिले उदाएका नयाँ पार्टी र युवा नेताहरूमाथि पनि खासै भरोसा छैन । उनी भन्छिन्, 'खै, अहिले आएका नयाँ पार्टी र युवाहरू पनि उस्तै होलान् जस्तो लाग्छ । उनीहरूबारे पनि यस्तो–उस्तो भनेर रेडियोमा समाचार सुनिन्छ । त्यसैले सबै उस्तै हुन् कि भन्ने लाग्छ ।' निर्वाचन नजिकिँदै गर्दा पनि यो निर्वाचनपछि देशको अवस्था राम्रो हुन्छ भन्ने विश्वास आफूमा नजागेको श्रेष्ठको भनाइ छ । 'सबैले देशका लागि भन्दा पहिले आफ्नै स्वार्थ हेर्छन्,' उनी भन्छिन्, 'त्यसैले जो आए पनि जनताको दुःख उस्तै रहने डर छ ।'

प्रतिनिधिसभा निर्वाचन क्षेत्र एक मात्रै रहेको रामेछापमा तीन जना स्वतन्त्रसहित १७ जना उम्मेदवार चुनावी मैदानमा छन् । उम्मेदवारहरू आ-आफ्नो निर्वाचन चिह्न लिएर मतदातामाझ गइरहेका छन् । यो निर्वाचनको उत्साह युवा मतदातामा बढी देखिएको छ । प्रतिनिधिमूलक केही मतदाताको भनाइ सुन्दा उमेर ढल्किसकेका मतदाताले यो निर्वाचनलाई गएका निर्वाचन जस्तै आउने जाने रूपमा लिएका छन् भने युवाहरूमा यो निर्वाचनले देशमा ठूलो परिवर्तन ल्याउनले उत्साह देखिएको छ ।