परासी — पश्चिम नवलपरासीका दुई निर्वाचन क्षेत्रका उम्मेदवार प्रचारप्रसारका लागि घरदैलोमा पुग्न थालेका छन् । यसरी मत माग्न आएका उम्मेदवारलाई मतदाताले भने पुराना वाचा सम्झाइरहेका छन् ।

अहिले उम्मेदवारहरू नेता–कार्यकर्तासित भेटघाटका साथै घरदैलोमा पुगेर भोट मागिरहेका छन् । निर्वाचन आयोगले फागुन ४ बाट मात्रै सभा, जुलुस र प्रचारप्रसार गर्न मिल्ने जनाएको छ । त्यसैले उम्मेदवारहरू मतदाताको घर–घरमा पुग्ने, समस्या बुझ्ने, यसअगाडि गरेका प्रतिबद्धता पूरा भए/नभएको बारेमा समीक्षा गरिरहेका छन् । तर, मतदाताले भने यस अगाडि गरेका प्रतिबद्धता पूरा गर्न नसक्नुको कारण र आगामी दिनमा काम गर्ने आधार खोजिरहेका छन् । 

सामाजिक सञ्जालमा सक्रिय उमेर समूहका देखि वृद्धवृद्धाले समेत आफ्ना सन्तानको भविष्य र मुलुकमा बढ्दै गइरहेको अस्थिरताबाट कसरी निकास पाउने र त्यसका लागि योजना के छन् भनेर प्रश्न गरिरहेका छन् । ‘उम्मेदवारहरू भेट्न आउने र टोलटोलमा छलफल चलाउने गर्न थालेका छन्,’ बर्दघाट–५ का राजेश श्रेष्ठले भने, ‘मतदाताले अब चुनाव जित्ने मात्र होइन, केन्द्रसम्म पहुँच राखेर बजेट र योजना ल्याउन सक्ने, नयाँ सोच र विचारमा ढल्किन सक्ने जनप्रतिनिधि खोजेका छन् ।’ 

जिल्लाको दक्षिणी भेगका बासिन्दाको मुख्य पेसा कृषि हो । उनीहरू उखु र केरा खेती गर्दै आएका छन् । भारतीय भित्रिँदा नेपाली किसानको केरा बिक्री नभएर बगानमै कुहिने अवस्था छ । उखु किसानको समस्या उस्तै छ । चिनी मिलले समयमा भुक्तानी नदिने र सरकारले नगदे बाली भनेर घोषणा गरे पनि उचित मूल्य र अनुदान नदिँदा किसान समस्यामा परेका छन् । आश्वासन मात्र दिनेभन्दा उत्पादित बस्तुको बजार ग्यारेन्टी गरिदिने जनप्रतिनिधि चाहिएको उनीहरू बताउँछन् । 

‘हाम्रो आम्दानीको स्रोत उखु खेती हो । समयमै मूल्य तोक्दिने, मल, बीउमा अनुदान दिने र चिनी मिलले नगदमा उखु खरिद गर्ने व्यवस्था मिलाउने उम्मेदवारलाई मतदान गर्ने हो,’ प्रतापपुर–६ का राकेश यादवले भने, ‘अब हामी पार्टीभन्दा पनि जनताको काम गर्न सक्ने उम्मेदवार चुन्छौं ।’