रुकुम पूर्व — नेकपा एमालेले आसन्न निर्वाचनमा देशभरबाट उठाउने उम्मेदवारको टुंगो लगाउन बाँकी जिल्लामा रुकुम पूर्व पनि परेको छ । शनिबार बसेको केन्द्रीय सचिवालय बैठकले प्रत्यक्षतर्फका १ सय ४० जना उम्मेदवारको टुंगो लगाउँदा रुकुम पूर्वसहित २५ क्षेत्र भने बाँकी रहेका हुन् ।

गत पुस २० गते बसेको एमाले रुकुम पूर्व जिल्ला कमिटीको बैठकबाट खेममान खड्का, आशा स्वर्णकार, चिन्तामणी दाहाल, मोहनभक्त बुढामगर र गोपालप्रसाद सुनार गरेर झण्डै आधा दर्जन नाम सिफरिस गरी पठाएको थियो । तर यी नाममध्येबाट को उम्मेदवार हुने भन्ने निर्णय गर्ने पार्टी केन्द्र नै 'अलमल'मा देखिएको छ ।

सामाजिक संजालमा खेममान खड्काको नाम सिफारिस भएको भन्ने विषय सार्वजनिक भए पनि त्यो आधिकारिक नभएको भन्दै केन्द्रीय सदस्य लिलामणी गौतमले हिजोको सचिवालय बैठकले कसैको नाम सिफरिस नगरेको बताए । ‘हामीले जिल्लाबाट आवश्यक सिफारिस गरेर प्रक्रिया पूरा गरिसकेका छौं । तर केन्द्रले नाम किन टुंगो लगाउन सकेन र होल्ड राख्यो भन्नेबारे जानकारी छैन,’ उनले भने, ‘उम्मेदवारी दिने दिनसम्म नामको टुंगो लाग्छ ।’