काठमाडौँ — प्रतिनिधिसभा निर्वाचनका लागि राष्ट्रिय स्वतन्त्र पार्टी (रास्वपा) को समानुपातिक उम्मेदवारको बन्दसूचीमा कलाकार प्रकाश सपुत पनि परेका छन् ।

रास्वपाले सोमबार सपुतसहित रास्वपाले ११० जनाको नाम निर्वाचन आयोगमा पेस गरेको हो ।

तपाईं त समानुपातिक सूचीमा पर्नुभएछ नि ? भन्ने कान्तिपुरको प्रश्नमा प्रकाशले भने, 'सरकार र नेपाली राजनीतिप्रति जहिल्यै गुनासो मात्रै गरिरहे पनि संसदीय प्रकियालाई नजिकबाट बुझ्न र देश विकास गर्न अब म राजनीतिमा होमिएको छु ।'

उनलाई एकपटक नजिकबाट संसदीय प्रक्रिया बुझ्न मन छ । किनकि त्यहाँ पुगेपछि नेताहरु इमानदार हुन सक्दैनन् भन्ने कुराको साक्षी बन्न मन लागेको उनले बताए । 'उमेरको उत्तरार्द्धमा कलाकारको जीवन निराशातर्फ ढल्किरहेको देखिन्छ । त्यो ऊर्जा र सोचलाई देशसँग किन नजोड्ने भनेरै राजनीतिमा आएँ,’ ३५ वर्षका प्रकाश भन्छन् ।

कलाकारितामार्फत पनि प्रकाशले राजनीतिज्ञ र सामाजिक बेथितिमाथि प्रश्न गर्दै आएका थिए । प्रश्न मात्रै गरिरहनुको साटो जवाफ दिने ठाउँमै पुग्ने सोचसहित जिम्मेवारी बोकेर राजनीतिमा आफूले पाइला चालेको प्रकाश सुनाउँछन् ।

‘यो निर्णय महत्त्वाकांक्षा नहोला, जिम्मेवार महसुस गरेर कम्तीमा राजनीति फोहोरी खेल हो भन्ने सोचबाट मानिसलाई मुक्त गराउने विचारले लागेको हुँ,’ प्रकाशले भने । काठमाडौं महानगरपालिका प्रमुख बालेन्द्र शाहको जोश र संसदीय राजनीतितर्फको छलाङसँग आफू प्रभावित भएको उनले बताए ।

एमाले, कांग्रेस र माओवादीलाई विभिन्न कालखण्डमा देशको प्रमुख शक्तिका रुपमा हेर्दै आए पनि बालेन्द्र-रवि समूहको राजनीतिक अभ्यास फरक रहेकाले पनि राजनीतिमा प्रवेश गरेको प्रकाश बताउँछन् । ‘देश बनिहाल्न समय लाग्ला । तर, यो नयाँ शक्तिले देश बिगार्न दिँदैन भन्ने छ । त्यसैले यो शक्तिलाई सहयोग गर्न पनि म राजनीतिमा आएँ । म धन्य छु, मेरो आगमनले समानुपातिकतर्फको एउटा भूमिका पाएँ,’ प्रकाशले भने, ‘यो नयाँ शक्तिले कसैलाई रिझाउनु पर्दैन । उहाँहरुले सिधै व्यवस्था सुधार्न सक्नुहुन्छ । संविधान त्यहीँ छ, व्यवस्था त्यहीँ छ । नीति त्यहीँ छन् । नीतिलाई कार्यान्वयन गर्ने, संविधान लागू गर्ने अनि सुधार मात्रै गर्न अब सकिन्छ होला भन्ने मलाई लाग्यो ।’ 

जब रास्वपाको उदय भयो, त्यो बेलादेखि नै प्रकाश राजनीतिमा आउने/नआउने, औपचारिक/अनौपचारिक छलफलमा सरिक थिए । स्थापित नेतासँग कुराकानी गरिहाले पनि त्यतिबेला मानसिक रुपले तयार थिएनन् । पारिवारिक जिम्मेवारी र कलाकारितालाई प्राथमिकता दिइरहे । तर, जब जेन–जी आन्दोलन भयो, बालेन्द्र राजनीतिमा आउने कुरा भयो तब प्रकाशको ध्यान राजनीतिले तानेको हो । 

‘यतिको मान्छेले कम्तीमा बिग्रन दिँदैनन् । प्रश्न गर्छन्, काम गर्छन्, सुधार्छन् भन्ने भयो । अनि मलाई लाग्यो यो अब हाम्रो समय हो,’ प्रकाशले भने ।