काठमाडौँ — अदालतमा विचाराधिन प्रतिनिधिसभा पुन:स्थापनासम्बन्धी रिटमा तत्कालीन प्रतिनिधिसभाका बहुमत सांसदहरुको हस्ताक्षरसहित पुरक निवेदन दिने प्रयोजनका लागि कांग्रेसका ५७ जना सांसदहरुले हस्ताक्षर गरेका छन् । 

यसअघि कांग्रेसका तत्कालीन प्रमुख सचेतक र सचेतकसहित सात सांसद र एमालेबाट तत्कालीन मुख्य सचेतक र सचेतकका तर्फबाट प्रतिनिधिसभा पुन:स्थापनासम्बन्धी छुट्टाछुट्टै रिट दायर भएको थियो । 

कांग्रेस केन्द्रीय कार्यसमितिले निर्वाचनमा जाने संस्थागत निर्णय गरे पनि पार्टी सभापति शेरबहादुर देउवा र एमाले अध्यक्ष केपी ओलीको परामर्शपछि प्रतिनिधिसभा पुन:स्थापनाको मुद्दालाई पनि सँगै अघि बढाउन लागिएको हो । तर, पार्टीभित्र यस मुद्दामा महामन्त्रीद्वय गगन थापा र विश्वप्रकाश शर्मा पक्षको भने सहमति छैन । 

हस्ताक्षर गर्नेमा संस्थापन र इतरपक्षका नेता शेखर कोइराला पक्षका सांसदहरु छन् । महामन्त्रीद्वय थापा र शर्मापक्षका सांसदहरुले भने हस्ताक्षर गरेका छैनन् । उनीहरुले अहिलेको संकटकालीन अवस्थाको निकास निर्वाचनमात्रै भएको भन्दै पुन:स्थापनाको पक्षमा कांग्रेस जान नहुने विचार राख्दै आएका छन् ।  

तीन दिनदेखि भइरहेको हस्ताक्षरमा आइतबार कांग्रेसका ५७, जनमतका दुई र एक स्वतन्त्र गरी ६० सांसदको हस्ताक्षर भएको छ । यसअघि तत्कालीन प्रमुख सचेतक श्याम घिमिरे, सचेतक सुशीला थिङसहित सात सांसदको संयुक्त हस्ताक्षरबाट रिट दायर गरिएको थियो । उनीहरुसमेत गर्दा कांग्रेसबाट प्रतिनिधिसभा पुन:स्थापनाको पक्षमा उभिने तत्कालीन सांसदहरुको संख्या ६४ जना पुगेको छ ।