काठमाडौँ — विदेशमा उच्च शिक्षा अध्ययन गरिरहेका नेपाली विद्यार्थीलाई आगामी निर्वाचनदेखि नै मतदानको अधिकार सुनिश्चित गर्न युवाहरुले निर्वाचन आयोगलाई ज्ञापनपत्र बुझाएका छन् ।

‘नयाँ युग’ र ‘जेन-जी मुभमेन्ट’ सहितका समूहको अगुवाइमा आइतबार कार्यवाहक प्रमुख निर्वाचन आयुक्त रामप्रसाद भण्डारीलाई ज्ञापनपत्र बुझाएको हो । 

'हामीले बुझाएको ज्ञापनपत्रमा तीन प्रमुख माग छन् । डिजिटल मतदान प्रणाली, पूर्ण मतदान अधिकार र तत्काल कार्यान्वयन,' जेन-जी अगुवा हेम चौधरीले भने, 'यो अभियानलाई विश्वभरका १२ देशका ६० भन्दा बढी नेपाली विद्यार्थी समूहले समर्थन जनाएका छन् ।' 

जेन-जी अगुवा चौधरी आफैं अमेरिकास्थित म्यासाचुसेट्स इन्स्टिच्युट अफ टेक्नोलोजी (एमआईटी) अध्ययन गरेर फर्किएका छन् । 

ज्ञापनपत्रमा विदेशमा रहेका नेपालीले प्रत्यक्ष तथा समानुपातिक दुवै प्रणालीमा सहभागी हुन पाउनुपर्ने माग गरिएको छ । अगुवा चौधरीले लोकतन्त्र स्थापना भएको १७/१८ वर्ष बितिसक्दा पनि विदेशमा बस्ने नेपालीले मूलभूत राजनीतिक अधिकार खोसिएको स्थिति रहनु अस्वीकार्य रहेको बताए । 

ज्ञापनपत्र बुझाउने टोलीले सरकारले विदेशस्थित नेपालीहरूलाई मताधिकार दिने प्रतिबद्धता जनाए पनि नीतिगत तथा प्राविधिक तयारीमा ढिलाइ भइरहेको भन्दै चिन्ता व्यक्त गरेका छन् । 'राजनीतिक दबाबभन्दा माथि उठेर आयोगले आवश्यक पूर्वाधार मिलाई यही चुनावदेखि विदेशमा रहेका सबै नेपालीलाई मतदान अधिकार उपलब्ध गराओस्,' ज्ञापनपत्रमा उल्लेख छ।