लोगोमा राष्ट्रिय झन्डा, धरहरा, पाँच तल्ले दरबार, पार्टीको निर्वाचन चिह्न आदिलाई बहुभाषिक रूपमा संयोजन गरिएको छ ।
काठमाडौँ — नेकपा (एमाले) ले पार्टीको आसन्न ११औं राष्ट्रिय महाधिवेशनको प्रतीक चिह्न (लोगो) सार्वजनिक गरेको छ ।
महाधिवेशन प्रचार समितिद्वारा पार्टी कार्यालय च्यासलमा आयोजित कार्यक्रममा अध्यक्ष केपी शर्मा ओलीले लोगो सार्वजनिक गर्नुभएको हो ।
पार्टीका सचिव एवं प्रचार समितिका संयोजक पद्मा अर्यालले उक्त लोगो पार्टीको इतिहास, आन्दोलन र संकल्पको कलात्मक रुप भएको बताइन् । लोगोमा राष्ट्रिय झन्डा, धरहरा, पाँच तल्ले दरबार, पार्टीको निर्वाचन चिह्न आदिलाई बहुभाषिक रूपमा संयोजन गरिएको छ ।
कार्यक्रममा पार्टीका वरिष्ठ उपाध्यक्ष ईश्वर पोखरेललगायत पदाधिकारीको उपस्थिति थियो । सोही अवसरमा महाधिवेशनकेन्द्रित 'जिङ्गल' पनि सार्वजनिक गरियो ।
मङ्सिर २७ देखि २९ गतेसम्म काठमाडौँमा महाधिवेशन हुँदै छ । मातहतका कमिटीमा प्रतिनिधि छनोटको काम पनि आइतबार सकिएको छ ।
