काठमाडौँ — कांग्रेस महामन्त्री कृष्णप्रसाद सिटौलाले महामन्त्री गगन थापाको सचिवालयबाट आफूहरूलाई सिध्याउन खेल भएको भनेपछि मंगलबारको बैठकमा चर्चाचर्की भएको छ । उक्त अभिव्यक्तिलाई लिएर सिटौला र थापाबीच नोकझोंक नै भएको हो । 

सिटौलाले बैठकमा आफूसहित सात पूर्व पदाधिकारीलाई खरानी दस्ता भनेर लखेट्दै गरेको भिडियो महामन्त्री थापाको सचिवालयबाट आएको भन्दै आपत्ति जनाएका थिए । त्यसलगत्तै थापाले सिटौलालाई आफ्नो सचिवालयले त्यस्तो भिडियो बनाएको प्रमाणित गरेर देखाउन माग गरे । 'हामीलाई सामाजिक सञ्जालमा खरानी दस्ता भनेर गाली गर्ने, लखेटेको भिडियो बनाएर महामन्त्रीकै सचिवालयबाट सामाजिक सञ्जालमा राख्ने ?,' सिटौलाले यसो भन्नासाथ महामन्त्री थापाले आपत्ति जनाउँदै त्यसको प्रतिवाद गरेका थिए । 

'कि त तथ्य प्रमाण राख्नुहोस । प्रमाणबिना जथाभावी बैठकमा बोल्न पाइन्छ ?,' थापाले कार्यवाहक सभापतिको ध्यानाकर्षण गराउँदै सिटौलाको भनाइको प्रतिवाद गरे । त्यसपछि कार्यवाहक सभापति पूर्णबहादुर खड्काले तथ्य प्रमाण केही छ भनेर सिटौलालाई सोधे । त्यसपछि मात्रै सिटौलाले आफ्नो भनाइ फिर्ता लिँदै 'सरी' भनेका थिए । 

महामन्त्री थापाले २ दिनदेखि धोबीघाटमा केन्द्रीय कार्यसम्पादन समितिको बैठकमा वान टु वान वार्ता हुँदा, बाहिर सँगै बस्दा समेत त्यसबारेमा कुनै कुरा नगरी बैठकमा गलत नियतका साथ यस्तो धारणा राखिएको बताएका थिए ।