काठमाडौँ — महामन्त्रीद्वय गगन थापा र विश्वप्रकाश शर्मा पक्षले मंसिरमै नियमित महाधिवेशन सम्पन्न गर्ने कार्यतालिका बिहीबारको बैठकमा प्रस्तुत गर्न नपाएमा विशेष महाधिवेशनको प्रक्रियालाई अघि बढाउने चेतावनी दिएका छन् । यसअघि महामन्त्री थापाले मंसिरमै नियमित महाधिवेशनका लागि प्रस्ताव दुई विकल्पसहितको कार्यतालिका केन्द्रीय कार्यसम्पादन समितिले अस्वीकार गरेको थियो । त्यसपछि थापाले उक्त कार्यतालिकालाई सार्वजनिक गरेका थिए । 

केन्द्रीय कार्यसमितिको बैठक अगाडि आआफ्ना रणनीति तयार पार्न बुधबार संस्थापन र विशेष महाधिवेशन पक्षधर नेताहरु छुट्टाछुट्टै बैठक बसेका थिए । निर्वाचन अगाडि कुनैपनि प्रकारको महाधिवेशन सम्भव नभएको निष्कर्ष निकालेको संस्थापन पक्ष अघिल्ला दिनका तुलनामा बुधबार भने केही लचक भएको सहभागी नेताहरूले बताएका छन् । संस्थापन पक्षीय एक केन्द्रीय सदस्यका अनुसार कार्यतालिका ल्याउनेबारेमा लचक वडादेखि केन्द्रसम्मकै तालिका ल्याउने कि तल्ला तहका मात्रै भन्ने बारेमा संस्थापन पक्षभित्र मतैक्यता छैन । 

यता विशेष महाधिवेशनका लागि अगुवाइ गर्ने नेताहरूले बिहीबारको बैठक अगाडि विशेष माधिवेशनको पक्षमा ५४ प्रतिशत हस्ताक्षरकर्ताहरुको तर्फबाट लिखित ध्यानाकर्षण पत्र बुझाउने तयारी गरेका छन् । ‘विशेष महाधिवेशनका लागि हस्ताक्षरकर्ताहरुका तर्फबाट बिहीबार कार्यवाहक सभापतिसहित पदाधिकारी र केन्द्रीय सदस्यहरुलाई ध्यानाकर्षण पत्र बुझाउने कार्यक्रम छ,’ गौतमले भनिन्, ‘१५ गते काठमाडौंमा भएका महाधिवेशन प्रतिनिधिहरुको भेलासमेत डाकिएको छ ।’ केन्द्रीय कर्यासमितिले विशेष र नियमित महाधिवेशन कुनैपनि नगर्ने निर्णय लिएमा भने देशभरकै महाधिवेशन प्रतिनिधिहरुको भेला बोलाउने तयारीसमेत छ ।’