काठमाडौं — सुरक्षाको कारण देखाउँदै शिवपुरीलगायत सेनाको ब्यारेकमा राखिएका दलका प्रमुख नेताहरु अन्य नेताको सम्पर्कमै रहेका छन् । निवर्तमान प्रधानमन्त्री एवं एमाले अध्यक्ष केपी शर्मा ओली, कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल राष्ट्रपति रामचन्द्र पौडेल र आफ्ना नेतासँगको सम्पर्कमै रहेको बुझिएको छ ।

बिहीबार रातिदेखि दलका शीर्ष नेता सम्पर्कमा नरहेको चर्चा चले पनि उनीहरु सम्पर्कमा रहेको निकट नेताहरुले बताएका छन् ।

राष्ट्रपति पौडेलले जेन-जीको मागअनुसार पूर्वप्रधानन्यायाधीश सुशीला कार्कीलाई अन्तरिम सरकारको प्रधानमन्त्री बनाउन देउवा, ओली, दाहाल र नेपालसँग कुराकानी गरेका थिए । बिहीबार राति दाहाल सेनाको विशेष सुरक्षामा शीतलनिवास समेत पुगेका थिए । त्यसअघि उनीहरुले आआफ्नो पार्टीमा छलफल गरेका थिए । दाहाल शीतलनिवास जानुअघि उनले माओवादी उपमहासचिव वर्षमान पुनलाई त्यहाँ पठाएका थिए ।