काठमाडौँ — नेकपा (एमाले) उपाध्यक्ष सुरेन्द्र पाण्डेले राष्ट्रपति भइसकेको व्यक्तिलाई राजनीतिक दलमा आबद्ध हुन संविधानले नरोकेको बताएका छन्। सोमबार काठमाडौँमा आयोजित नेकपा (एमाले) को लोकतान्त्रीकरण विषयक अन्तर्संवाद कार्यक्रममा बोल्दै उनले संविधानमा नभएको व्यवस्थालाई कुनै पार्टीले विधान बनाएर वा निर्णय गरेर रोक्न नमिल्ने बताए।

पूर्वराष्ट्रपति विद्यादेवी भण्डारी एमालेमा सक्रिय रहँदै सदस्यता नवीकरण गर्न पहल गरेसँगै नेकपा (एमाले) ले उनको सदस्यता नवीकरण हुन नसक्ने निर्णय गरेको छ।

राष्ट्रपति जस्तो गरिमामय पदमा बसेको व्यक्ति पुनः राजनीतिक दलमा आउनुले व्यवस्थामाथि नै प्रश्न उठ्ने एमालेको ठम्याइ छ। तर एमालेभित्रै कतिपय नेताहरू भने संविधानले नरोकेको कुरा पार्टीले रोक्न नमिल्ने र सदस्यता नवीकरण हुनुपर्ने माग गर्दै आएका छन्। पूर्वराष्ट्रपति भण्डारी पनि एमालेको सक्रिय नेताका रूपमा आफूलाई प्रचार गर्दै आएकी छिन्। सोही विषयमा बोल्दै उपाध्यक्ष पाण्डेले विधान महाधिवेशनमा यसबारे विषय उठाउने बताएका छन्।

उनले भने, संविधानले निर्वाचित भएको पद, मनोनीत भएको पद र नियुक्त भएको पद राष्ट्रपति भएपछि स्वतः समाप्त हुन्छ मात्र भनेको हो। आउँदो महाधिवेशनमा यो विषयमा प्रश्न हुने, छलफल हुने र सहमति भए सहमति हुने वा भिन्न मत राख्ने अधिकार रहन्छ। पार्टीका डकुमेन्टहरू महाधिवेशनअघि नै आउने, छलफल हुने र सल्लाह अनुसार संशोधन हुन्छ।'