काठमाडौँ — राष्ट्रिय प्रजातन्त्र पार्टी (राप्रपा) की सांसद रोशन कार्कीले उपसभामुखविरुद्ध अविश्वास प्रस्तावमार्फत हटाउन खाली कागजमा हस्ताक्षर गरिएको भन्दै सत्तारूढ दलहरूप्रति कटाक्ष गरेपछि नेकपा (एमाले) का सांसद सूर्य थापाले नियमापत्ति जनाएका छन् ।

प्रतिनिधिसभाको बुधबारको बैठकमा बोल्दै सांसद कार्कीले एमाले र कांग्रेसका सांसदलाई खाली कागजमा हस्ताक्षर गराएर नाटक रचिएको टिप्पणी गरेपछि सांसद थापाले आपत्ति जनाए । सांसद कार्कीले संवैधानिक परिषद्मा बहुमत नपुग्दा आफ्ना आसेपासेलाई नियुक्त गर्न उपसभामुखलाई निशाना बनाइएको आरोप लगाइन् । उनले भनिन्, ‘संवैधानिक परिषद्मा बहुमत पुगेन भनेर उपसभामुखमाथि महाअभियोग लगाउन ? कस्तो पार्टी ? कस्ता सांसद ? धिक्कार होस् ।’

कार्कीले अगाडि थपिन्, ‘हिजो दिनभरि नौटंकी देखियो । एमाले र नेपाली कांग्रेसले आफ्ना माननीयलाई खाली कागजमा हस्ताक्षर गरेको भन्ने खबर सुनियो । यो केका लागि त ? यो किन त भन्दा उपसभामुखलाई अविश्वासको प्रस्तावमार्फत हटाउन रे । उनीहरूलाई संवैधानिक परिषद्मा बहुमत पुगेन । बहुमत पुर्‍याएर आफ्ना आसेपासेलाई नियुक्त गर्न उपसभामुखमाथि महाअभियोग लगाउने कुरा चल्यो । सही गराउने कस्तो पार्टी ? सांसद कस्ता ? धिक्कार होस् ।’