सडक विभाग र जाइकाले सवारीसाधनका लागि आधिकारिक रूपमा खुला गर्नुअघि सुरुङभित्र ‘फन रन एण्ड वाक २०२६’ को आयोजना गरेको हो । सुरुङमार्ग पूर्ण रूपमा सञ्चालनमा आएपछि यसको सुरक्षित प्रयोगका लागि सहभागीलाई सुरुङका मुख्य सुरक्षा विशेषता, उचित प्रयोगका तरिका, आपतकालीन प्रणाली र आवश्यक सुरक्षा निर्देशनहरूका बारेमा जानकारी गराइएको थियो ।

‘फन रन एन्ड वाक’ मा राष्ट्रिय म्याराथन कीर्तिमानधारी वैकुण्ठ मानन्धरलगायतको उपस्थिति रहेको थियो । सरकारी अधिकारी, जापानी दूतावास र जाइकाका प्रतिनिधि, स्थानीय सरकारका प्रतिनिधि, व्यावसायी, विद्यार्थी, जापानी स्वयंसेवक, आयोजनाका विज्ञ, सञ्चारकर्मी र अन्य सरोकारवालासहित ४ सयभन्दा बढी उपस्थिति रहेको जाइकाले जनाएको छ ।

यो सुरुङमार्गले यातायात सम्पर्कमा सुधार गर्ने, सडक सुरक्षा बढाउने, यात्राको समय घटाउने र नेपालको सामाजिक–आर्थिक विकासमा योगदान पुर्‍याउने एक महत्वपूर्ण कडीको रूपमा काम गर्ने जाइकाको भनाइ छ । विभिन्न प्राविधिक तथा व्यवस्थापकीय कारणले सञ्चालनमा आउन ढिलाइ भएको सुरुङमार्ग अब चरणबद्ध रूपमा सञ्चालनमा ल्याइने तयारी छ ।

सुरुङमार्ग प्रयोग गर्ने सवारीसाधनका शुल्क निर्धारण भइसकेको छ । कार र भ्यानले काठमाडौं भित्रिँदा ६५ र बाहिरिँदा ६० रुपैयाँ शुल्क तिर्नुपर्नेछ । मिनीबस–ट्रक र टिपरलाई काठमाडौं भित्रिँदा १ सय १५ र बाहिरिँदा ८० रुपैयाँ शुल्क तोकिएको छ । बस, ट्रकले सुरुङमार्ग भएर काठमाडौं छिर्दा २ सय ६० र यही मार्ग भएर बाहिरिँदा २ सय रुपैयाँ शुल्क तिर्नुपर्नेछ । नागढुंगा–सिस्नेखोला सुरुङमार्ग यातायात सञ्चालनसम्बन्धी निर्देशिका, २०८१ अनुसार सुरुङ सञ्चालनमा आएपछि पैदलयात्री, दुईपांग्रे, तीनपांग्रे सवारी र नन–मोटोराइज्ड सवारीले भने सुरुङमार्ग प्रवेश पाउने छैनन् ।