बर्खायाम सुरु भएसँगै लेकाली पाटनहरूमा प्रकृतिले हरियाली रंग भर्न थालेको छ। यही सुन्दरताले यतिबेला रुकुम पूर्वको चौँरी लेकमा रमाउनेहरूको संख्या बढिरहेको छ।

समुद्री सतहदेखि करिब ४ हजार मिटर उचाइमा रहेको महिमालको फेदी, फूलैफूलको आँगन, चुङुरी बुकी अर्थात् रुकुम पूर्वको चौँरी लेक। हिमालकै काखमा ओत लागेजस्तो देखिने यहाँका पहाडी थुम्काहरूमा यतिबेला रंगीचंगी बुकी फूलहरू ढकमक्क फुल्न थालेका छन्। यो दृश्य देख्दा लाग्छ, हाम्रो सपना र कल्पनामा आउने एउटा सुन्दर ‘स्वप्न बगैँचा’ यही हो।

बेँसीतिरबाट गाईबस्तु र भेडा बाख्राका बथान चरिचरणका लागि उकालो लागिसकेका छन्। उनीहरू साउनको पहिलो सातासम्म यहाँ आइपुग्छन्। त्यसपछि यी पाटनमा रौनक अझै थपिन्छ।

यो सुन्दरतासँग रमाउँदै शीतल बतासमा मन र शरीरलाई विश्राम दिई शान्ति र आनन्द लिन यहाँ पुग्नेहरूको संख्या बर्सेनि बढिरहेको छ। यहाँ जो आएको छैन, उसले यसको सौन्दर्यको अनुभूति गर्न पाएको छैन। जो यहाँ पुगेको छ, उसलाई यहाँबाट फर्किन मन मान्दैन।

मध्य पहाडी लोकमार्ग हुँदै रुकुम पूर्व र बागलुङको सीमास्थित पाथीहाल्नेसम्म पुगेपछि करिब आधा घण्टा कच्ची सडकमा यात्रा गरी कोईपासम्म गाडीमा पुग्न सकिन्छ। त्यहाँबाट करिब साढे एक घण्टा पैदल हिँडेपछि चौँरी लेकको चुचुरोमा पुगिन्छ।

यहाँका यी फूलहरू साउनको मध्यसम्म रहन्छन्। त्यसपछि अर्को प्रजातिका फूलहरू ढकमक्क फुल्न थाल्छन्। तर यहाँ पुग्नेहरूले जथाभावी फूल टिप्ने र फोहोर फाल्ने गरेकाले यसको प्राकृतिक सौन्दर्यमा नकारात्मक असर परेको छ।

लेकाली पाखामा फूलेका रंगीचंगी फूलहरू कुनै गलामा उनिएका मोतीझैँ देखिन्छन्। लेकाली हावासँगै उनीहरूले सुवास छर्दै ढलपल–ढलपल गरिरहेका हुन्छन्। यो सुन्दरतामा रम्न र प्रकृतिसँग झुम्न यहाँहरूलाई पनि हार्दिक स्वागत छ।