विश्वको सर्वोच्च शिखर सगरमाथा ३२औं पटक सफलतापूर्वक आरोहण गरेर आफ्नै विश्व कीर्तिमानलाई थप विस्तार गरेका शेर्पालाई शुक्रबार काठमाडौंमा स्वागत गरिएको हो । अभियान अधिकारीहरूका अनुसार ५६ वर्षीय शेर्पा जेठ ३ गते बिहान १०:१२ बजे शिखरमा पुगेका थिए । यससँगै उनले विश्वकै सबैभन्दा धेरै पटक सगरमाथा आरोहण गर्ने कीर्तिमानलाई अझ मजबुत बनाएका छन् ।

यसअघि उनी २०८२ जेठ १३ गते सर्वोच्च शिखरमा पुगेका थिए । सोलुखुम्बुको थामेका कामीरिताले २४ वर्षको उमेरमा २०५१ सालमा पहिलोपटक सगरमाथा आरोहण गरेका थिए ।

त्यसयता उनी सगरमाथा केटू, मनास्लु, ल्होत्से लगायतका ८ हजार अग्ला हिमालहरू ४५ पटक उक्लिसकेका छन् । उनले एकै सिजनमा दोहोर्‍याएर पाँच पटक सगरमाथा आरोहण गरिसकेका छन् । विश्वभर ‘एभरेस्ट म्यान’ नामले पनि कहलिएका कामीरिताले आफ्नै रेकर्ड तोड्दै आइरहेका छन् ।