दरबारमार्गस्थित तीनधारा पाठशालाबाट चैते दसैंका दिन रथयात्रा सुरु हुन्छ । प्रत्येक वर्ष चैत्र शुक्ल अष्टमीदेखि दशमीसम्म राजधानीमा सेतो मच्छेन्द्रनाथको रथयात्रा गर्ने चलन छ । सेतो मच्छेन्द्रनाथलाई वर्षा र सहकालका देवता मानिन्छ ।

चैत्र शुक्ल सप्तमी अर्थात् चैत्र ११ गते रथ बनाइसकिने गुठी संस्थानका प्रवक्ता जनक पोखरेलले जानकारी दिए । रथ निर्माणका लागि काठलगायत व्यवस्था संस्थानले गर्छ । यस वर्ष पहिलो दिन चैत १२ गते रथ असन पुर्‍याइनेछ । रथ असन पुगेपछि पूजा, आराधना गरिनेछ । सहरको भित्री भागमा तीन दिनसम्म रथयात्रा चल्ने हुनेछ । असन, वसन्तपुर, जैसीदेवल, लगन हुँदै पुनः रथयात्रा मच्छेन्द्रबहालमा ल्याएर समापन हुनेछ ।

१२ गते कुमारीलाई पनि तीनधारा पाठशाला परिसरमा लगेर रथयात्रा सुरु गर्ने परम्परा रहेको सेतो मच्छेन्द्रनाथका पुजारी नीलकाजी शाक्यले बताए । सोही दिन राति राष्ट्रपति रामचन्द्र पौडेलले रथको दर्शन गरी प्रसाद ग्रहण गर्ने कार्यक्रम छ ।