धेद्रे र लेनडाँडा सुरुङभित्र फिनिसिङको काम भइरहेको छ भने दुवै सुरुङको मुखमा अग्ला र आकर्षक पुल निर्माण गरिएको छ । धेद्रे सुरुङको दूरी १ हजार ६ सय ९१ मिटर र लेनडाँडा सुरुङको दूरी १ हजार ६ सय २३ मिटर छ । दुवै सुरुङमा काठमाडौंबाट निजगढ र निजगढबाट काठमाडौं जानेगरी छुट्टाछुट्टै समानान्तर चारवटा सुरुङ निर्माण गरिएको हो ।

अग्ला पुल पनि त्यसैगरी चारवटा समानान्तर रूपमा निर्माण गरिएको छ । यीबाहेक थप पाँचवटा सुरुङको निर्माण हुँदै छ । केहीको निर्माण सुरु गरिएको र केही सुरु गर्ने तयारी हुँदै छ । गाडी चल्ने सुरुङमध्ये यो नेपालकै सबैभन्दा लामोसमेत हो । जसको दूरी ३ हजार ४ सय ५५ मिटर रहेको छ । अहिलेसम्म २ हजार ३ सय ४८ मिटर खन्न बाँकी छ । सुरुङ खन्ने काम ७० प्रतिशत सकिसकेको र असारसम्म ‘ब्रेक थ्रु’ गर्ने तयारी रहेको सैनिक प्रवक्ता एवं सहायक रथी राजाराम बस्नेतले बताए ।

लेनडाँडा र धेद्रे सुरुङ कामसँगै थालिए पनि चाइना स्टेट कन्स्ट्रक्सन इन्जिनियरिङ कर्पोरेसनले लिएको महादेवटार सुरुङ खन्न ढिलाइ गर्दा समयमै ‘ब्रेक थ्रु’ हुन नसकेको हो । अहिले काठमाडौं–तराई/मधेश द्रुतमार्गका विस्तृत परियोजना रिपोर्ट (डीपीआर) मन्त्रिपरिषद्‍बाट स्वीकृत हुन समय लाग्दा समयमै काम सुरु हुन सकेन ।

मन्त्रिपरिषद्ले २१ वैशाख २०७४ मा द्रुतमार्ग निर्माण व्यवस्थापनको जिम्मा सेनालाई दिने निर्णय गरेको थियो । पछि भौतिक पूर्वाधार तथा यातायात मन्त्रालयले २७ साउन २०७४ मा सेनालाई आयोजना हस्तान्तरण गरेको हो । त्यहीअनुसार सेनाको व्यवस्थापनमा यसको निर्माण भइरहेको छ । द्रुतमार्गको कुल दूरी ७०.९७७ किमि छ ।

समग्रमा सुरुङमार्गको दूरी मात्र १०.९७९ किमि पर्छ । उक्त मार्गमा निर्माण गरिने विशेष प्रकारका ८९ पुलमध्ये १३ वटाको निर्माण सकिइसकेको छ । त्यस्तै पुलको दूरी मात्र १२.८८५ किमि रहेको छ । समग्र आयोजनाको निर्माण समय अवधि चैत ०८३ सम्म छ भने भौतिक प्रगति ४५.१६ प्रतिशत छ ।