मौलिकता झल्किने स्टलमा रैथाने परिकार सजाइएको भेटिन्छ । प्रदर्शनीमा डोको–डालो, नाङ्लो, हलो–जुवा र ठेकी– मदानीदेखि चौंठो हुँदै मान्द्रोलगायतका परम्परागत कृषियन्त्र सजाइएका छन् ।

पुस १० गतेयता फिदिम नगरपालिका–४ गढी क्षेत्रमा लागिरहेको चासोक मेला यी र यस्तै दृश्यले सूसज्जित छ । किरात समुदायले मनाउने उधौली पर्वका अवसरमा हरेक वर्ष पुस १० देखि २० गतेसम्म मेला लाग्ने गर्छ । मेला रैथाने संस्कार र संस्कृति जगेर्ना गर्ने उद्देश्यसहित लगाउँदै आएको आयोजकको भनाइ छ । यो वर्ष इलाम, झापा, ताप्लेजुङ र तेह्रथुम मात्रै नभएर छिमेकी मुलुक भारतको सिक्किमबाट समेत मेला भर्न आइपुगेका छन् भने लगभग ४० हजारले मेला भरेको आयोजक सुम्जिरि सुम्हात्लुङ आम्बेपज संरक्षण प्रतिष्ठानका अध्यक्ष नन्द लावतीले बताए ।

पश्चिमा संस्कार र संस्कृतिको सिको गर्दा नेपाली मौलिकता ओझेलमा परिरहेका बखत पूर्वी पहाडमा अस्तित्वमा रहेका विभिन्न जातजाति र भाषाभाषीको मौलिक संस्कृति, पहिरन र भेषभूषा जगेर्ना गर्ने उद्देश्यले यस्तो मेला लगाइएको आयोजकसमेत रहेका फिदिम–४ का वडाध्यक्ष उपेन्द्र लावतीले बताए ।