४२ प्रतिशत लिम्बू समुदायको बसोबास रहेको ताप्लेजुङमा याक्थुम चुम्लुङको आयोजनामा सदरमुकाम फुङलिङमा सोमबार र्‍याली शुभकामना आदानप्रदान लगायतको कार्यक्रम आयोजना गरिएको थियो । कार्यक्रममा यालाङ, केलाङ, धान नाच, च्याब्रुङ नाच, हाक्पारे लगायतका प्रस्तुति भए । लिम्बू समुदायको विशेष पर्व भन्दै फुङलिङ नगरपालिकाले सोमबार सार्वजनीक बिदा पनि दियो । संघीय र प्रदेश सरकारले भने मंसिर १८ गतेका लागि बिदा दिएका छन् । ताप्लेजुङमा पाँच वर्षदेखि मंसिर १ गतेकै दिन याक्थुङ चुम्लुङले र धान्ने पूर्णिमाको दिन किरात याक्थुङ चुम्लुङले चासोक मनाउँदै आएका छन् ।

संघीय सरकारले दिएको बिदा ढिलो गरी हुने र नयाँ अन्न खान थालिसकेको हुनाले प्रकृति रिसाउलान् भनेर मंसिर १ गतेको दिनलाई नै न्वागी खाने दिनको रुपमा मनाउन थालिएको याक्थुङ चुम्लुङ अध्यक्ष हाङमायाले बताइन् । याक्थुङ चुम्लुङका केन्द्रीय सदस्य जसबहादुर लिम्बूका अनुसार यतिबेला धान, कोदो, मास, मस्यामलगायतका बाली ठिक्क पाकेर ढिकुटीमा लगाएको र कसैले लगाउने तयारीको बेला रहेको छ । यतिबेला मनाए साँच्चै नयाँ बाली प्रकृतिलाई चढाएर मात्रै खान मिल्छ । ‘खाएर मनाउनु त भएन नि,’ जसबहादुरले भने, ‘साँच्चै नयाँ बाली चढाएर खाउँ भनेर मंसिर १ लाई रोजेका हौं ।’