पछिल्ला केहीदिनयता पाँचथरको फालेलुङ गाउँपालिकाका उच्च पहाडी र हिमाली भेगमा साँच्चिकै रमाइलो बनेको छ ।

‘वर्षायाम पछि दसैँमासमेत नखुलेको मौसम यतिखेर यहाँ सफा छ । बाढी पहिरोपश्चात ठप्प भएको मान्छेको आउजाउ छिटफुट सुरु भयो,यो बेला फालेलुङ आइपुग्ने जो कोही भरपुर मनोरञ्जन र स्वर्गीय आनन्द लिएर फर्किन पाउँछन् ।’ फालेलुङ–४ का फिपराज लिम्बूले भने । हिमालमा हिउँ पर्न थालेसँगै उच्च पहाडी भूभागको वातावरण साँच्चिकै रमाइलो हुन्छ । विगत वर्षहरुमा यो सिजन फालेलुङका गोठ र घर सँगै होमस्टे र लज खचाखच हुन्थे । यो वर्ष प्रतिकुल मौसमका कारण पर्याप्त पर्यटक आउन सकेका छैनन् । भारतको पश्चिम बंगाल र नेपालको पाँचथर क्षेत्रबाट डाँडा उक्लिएका मानिस यहाँ मस्त रमाइरहेका भेटिन्छन् ।