तिहार लागेसँगै भक्तपुरका बजारमा तिहारको चहलपहल बढ्यो [तस्बिरहरु]

लक्ष्मी पूजा, म्ह पूजा र किजा पूजा (भाईटीका)का लागि आवश्यक सामग्री किनमेल गर्न भक्तपुरका स्थानीय स्तरका बजारमा बिहानदेखि भिड लागेको छ ।

कार्तिक ३, २०८२

सुन्दर शिल्पकार

भक्तपुर — तिहार लागेसँगै भक्तपुरका बजारमा तिहारको चहलपहल बढेको छ । आज बिहान कुकुर पूजा गरी साँझ धनधान्यकी देवी लक्ष्मीको पूजा गरिँदैछ । लक्ष्मी पूजा, म्ह पूजा र किजा पूजा (भाईटीका)का लागि आवश्यक सामग्री किनमेल गर्न भक्तपुरका स्थानीय स्तरका बजारमा बिहानदेखि भिड लागेको छ ।

With the onset of Tihar, the hustle and bustle of Bhaktapur's markets has increased [Photos]

भक्तपुर नगरपालिकाको दत्तात्रय, सुकुलदोका, पसिखेल, तमाःरी, गहिःती, नासमना, बंशगोपाल, कमलविनायक तथा सूर्यविनायक चोक, मध्यपुर थिमी नगरपालिकाको बालकुमारी मन्दिर प्रंगण, हात्तिमहांकाल, बाखाबजार, शंखधरचोक लगाएका बजारमा चहलपहल बढेको हो ।

भक्तपुरको दत्तात्रयमा तिहारका लागि आवश्यक फलफूल, मखमली तथा सयपत्री माला, भाईमसला, सप्तरंगी टीका, माटोका पाला लगायतका सामग्रीहरू व्यापारीले बिक्रीका लागि राखेका छन् । बिहानदेखि स्थानीयहरू तिहारको लागि आवश्यक समाग्री जोहो गर्न व्यस्त बनेका छन् ।

भक्तपुरमै नेवार समुदाय फरक–फरक समयमा म्ह पूजा र किजा पूजा (भाईटीका) मनाउने भएका छन् । भक्तपुर नगरपालिकामा तलेजुका पुजारीहरूको निर्णय अनुसार आज लक्ष्मी पूजा, भोलि म्ह पूजा र ५ गते किजा पूजा( भाईटीक) लगाई मनाउने निर्णय भएको नगरप्रमुख सुनिल प्रजापतिले बताए ।

यस्तै मध्यपुर थिमी नगरपालिकामा भने भोलि लक्ष्मी पूजा, ५ गते म्हःपूजा र ६ गते किजा पूजा (भाईटीका) लगाउने मध्यपुर थिमी नगरपालिकाका प्रमुख सुरेन्द्र श्रेष्ठले बताए ।