कञ्चनपुर — दसैंका दिन थारु बस्तीमा सखिया नृत्यको रौनक छ । परम्परागत पहिरनमा सजिएका महिलाहरू गीत गाउँदै नाचिरहेका छन् भने पुरुषहरू मादल बजाइरहेका छन् । दसैँ सुरु भएसँगै थारु बस्तीमा सखियाको रौनक चलेको छ । हरेक बस्तीमा सखिया नाच चलेको छ । हरेक बस्तीमा घर घरै पुगेर सखिया नाच गरिन्छ । सखिया नाच्न आउनेलाई ढिकरी जाड र मासु खुवाइन्छ । विगतमा सखिया भदाैमा हरेली पूजासँगै सुरु हुन्थ्यो भने अहिले घटस्थापनादेखि सुरु हुन्छ । दसैंका दिन सबै घरमा पुग्न नसके अर्को दिन पनि सखिया नाचिन्छ ।