काठमाडौँ — आगामी आर्थिक वर्षको बजेटमा कर बढ्ने अनुमानमा व्यवसायीले अत्यधिक मात्रामा विद्युतीय सवारी (ईभी) भित्र्याइरहेका छन् । १५ वैशाखयता मात्रै एक हजार ५० वटा ईभी जाँचपास गराएर चोभार सुक्खा बन्दरगाहमा राखिएका छन् । यस्तै, जाँचपासका लागि तातोपानी नाकामा एक हजारभन्दा बढी ईभी राखिएका छन् ।
आर्थिक वर्ष ०८०/८१ मा ५० किलोवाटसम्मको ईभीमा १५ प्रतिशत भन्सार तिरे पुग्थ्यो । ०८१/८२ मा ५० किलोवाटसम्मको ईभीमा ५ प्रतिशत अन्त:शुल्क थपियो । ०८०/८१ मा ५१ देखि १०० किलोवाटको ईभीमा १५ प्रतिशत भन्सार र १० प्रतिशत अन्त:शुल्क लाग्ने गरेकामा ०८१/८२ मा भन्सार र अन्त:शुल्क ५–५ प्रतिशत बढाइएको थियो ।
