स्वर्गद्वारी गुठीपीडित मोही किसान संघर्ष समिति दाङको संयोजनमा काठमाडौँ आएका उनीहरूले स्वर्गद्धारी गुठीको जग्गा मोही किसानको नाममा रैतानी गर्ने गरी गुठी ऐन जारी हुनुपर्ने माग गरेका छन् । स्वर्गद्वारी आश्रमका मोही किासनको मोहीयानी हक प्रमाणपत्र अनुसारको जग्गा प्राप्तिको कानून निर्माणका लागि दबाब दिन आफूहरू धर्नामा उत्रिएको संघर्ष समितिका सचिव भरत गिरीले जानकारी दिए । उनका अनुसार उनीहरूले २०४५ सालदेखि नै जिल्ला केन्द्रित आन्दोलन गर्दै आएका छन् । तर आफूहरूको मागबारे सरकारले सुनुवाई नगरेपछि अहिले काठमाडौँमै आएर धर्ना बस्नुपरेको हो ।

'स्वर्गद्वारी गुठीको मोही दाङ जिल्लामा १२ मौका (गाउँ) मा ३ हजार ५ परिवारका करिब १६ हजार जनस‌ङ्ख्याको बसोबास छ । कुल १ हजार ५० विपा जमिन गुठीअन्तर्गत छ । किसानले खेतीपाती गर्दै बसोवाससमेत गर्दै आएको पुस्तौं बित्यो, उक्त जग्गा हाम्रै बाजे, जिजुबाजेले खेतीयोग्य बनाएका हुन्। स्वामित्य भने स्वर्गद्वारी गुठीको नाममा छ,' संघर्ष समितिले जारी गरेको विज्ञप्तिमा उल्लेख छ, 'हामीसँग मोहीयानी पुर्जा छ। त्यो पनि २०६२ चैत १४ गते सर्वोच्च अदालतको संयुक्त इजलासबाट परमादेशसमेत जारी गरी खारेजी गरिएको छ।'

जग्गा जोतखन, स्याहार, संरक्षण र माया गर्ने किसानहरूलाई नै जमीनको स्वामित्व नहुने अवस्था हुनु ठूलो अन्याय भएको उनीहरूको दाबी छ । 'हामीले जोतखन गर्दै आएको जग्गाको स्वामित्व माग गर्दा नदिएपछि बाध्य भएर राज्यको ध्यानकर्षण गराउनको लागि काठमाडौं केन्द्रित आन्दोलनमा छौं। गत वर्ष २०८० फागुन ७ देखि १ महिना लामो आन्दोलन दाङमै गर्‍यौँ,' उनीहरूले भनेका छन् । त्यसबेलाको आन्दोलन सरकारसँग दुई बुँदे सम्झौता भएपछि स्थगित भएको थियो ।