विश्वमा अशान्ति बढ्दै गएका बेला पुरातात्त्विक तथा ऐतिहासिक स्थल तिलौराकोटमा आएर उनीहरूले सामूहिक रूपमा शान्तिको कामना गरेका हुन् । राजधानी सोलमा मुख्यालय रहेको ज्वइन टूगेदर सोसाइटी अन्तर्राष्ट्रिय राहत संस्थासँग आबद्ध उनीहरूलाई धर्माचार्य भम्यङ सुनिमले शान्तिको उद्गमस्थलमा आई पूजापाठ गराई प्रार्थना गराएका थिए । उनीहरूलाई धार्मिक विधिपूर्वक शिल र परित्रान पाठ गराइएको हो ।

प्रार्थनापछि आफूहरूलाई यहाँबाट आध्यात्मिक ऊर्जा पाई शान्तिको अनुभूति भएको धर्माचार्य भम्यङ सुनिमले बताए ।

४ सय १ धर्मावलम्बीले दुई घण्टा लामो प्रार्थना गरेका थिए । त्यस्तै उनीहरूले भगवान गौतम बुद्धले ज्ञान प्राप्त गरेपछि राजधानी फर्किंदा पहिलो पटक बुद्धसँग उनका बाबुले भेट गरेको ठाउँ निग्रोधाराम र राजा शुद्धोदन तथा रानी मायादेवीको समाधिस्थल मानिएको धमनिहबा स्तुपमा पनि गई प्रार्थना गरेका थिए ।