सरकार राजनीति दल र जेन–जी युवाहरू प्रधानमन्त्री निवास बालुवाटारमा एउटै थलोमा बसेर वार्ता गरेको भन्ने सुनियो । यसलाई सकारात्मक मान्न सकिन्छ । प्रधानमन्त्री सुशीला कार्कीको उद्देश्य निर्वाचन भन्ने सुन्दा अचम्म लाग्यो । निर्वाचन गराउनकै लागी सुशीला कार्कीलाई प्रधानमन्त्री बनाएको हो ? यदि हो भने केही छैन । नत्र किन सधैं एउटै रटान लगाइन्छ ।

सबै मिलेर देशलाई राजनीति निकास दिनुपर्छ । त्यसो भन्दैमा निर्वाचन गराउनु मात्र अन्तिम विकल्प होइन । निर्वाचनमा जानुभन्दा पहिला देशमा शान्तिसुरक्षा र लुटिएका हतियार फिर्ता गर्नु परेन ? प्रहरी अहिले पनि फिल्ड जान डराउँछन् । जेलबाट भागेका कैदीहरू अझ सम्पर्कमा आएका छैनन् । यस्तो अवस्थामा निर्वाचन भनेर रटान लगाउनु ठीक होला ?

सरकारले अहिलेसम्म मन्त्रीमण्डल विस्तार गर्न सकेको अवस्था छैन । अति आवश्यक मन्त्रालय परराष्ट्र र रक्षामन्त्री नै छैनन् । सरकार केका लागि बन्यो, पहिला सोच्न पर्‍यो । गोलमेच सम्मेलन गरेर मात्र देशले निकास पाउँदैन । होला, कार्कीको प्रधानमन्त्रीकाल सफल रहला । तर देशको अवस्था भने जस्ताको त्यस्तै रहने पक्का छ ।