काठमाडौँ — जेन–जीको आन्दोलन र कुर्बानीलाई ख्याल–ख्याल सम्झने काम कसैले नगरौं । प्रत्यक्ष निर्वाचित प्रधानमन्त्रीका लागि कांग्रेस र एमाले तयार देखिएका छैनन् । यो सरासर गलत हो ।

युवाका आवाज सुन्न नसक्ने दल युवाको दल बन्नै सक्दैन । एमाले र कांग्रेसमा पनि रूपान्तरणको आवश्यकता छ । सधैं बुढा नेताले देशको बागडोर सम्हालेर भएन । अब युवालाई अघि बढाउनुपर्‍यो । 

कतिन्जेल हामीले एउटै व्यक्ति प्रधानमन्त्री बनेको हेर्नुपर्ने हो ? प्रत्यक्ष निर्वाचित प्रधानमन्त्रीको जेन–जी बटमलाइनबाट उनीहरूलाई भड्काउने प्रयास र दबाब नदिऔं । जे उद्देश्य राखेर आन्दोलन भएको थियो, ती माग पूरा हुँदैनन् भने आन्दोलनको अर्थ रहँदैन । ७४ जनाको बलिदान खेर नजाओस् । कसले जित्छ र कसले हार्छ भन्ने कुरासँग मतलब छैन ।

जनताले जसलाई जिताउँछन्, उही प्रधानमन्त्री बन्छ । एउटै व्यक्ति बारम्बार प्रधानमन्त्री बन्ने र जनताले चाहेको व्यक्ति प्रधानमन्त्री हुन नपाउने विधि प्रजातान्त्रिक पद्धति हुनै सक्दैन । यस्तो प्रथाको अन्त्य आवश्यक छ । प्रजातन्त्रको नाम जपेर नेताले राज गर्ने व्यवस्थालाई प्रजातन्त्र मान्न सकिँदैन । जनतामाथि जनताले शासन गर्ने व्यवस्थालाई प्रजातन्त्र भनिन्छ तर दुःखलाग्दो कुरो नेपालमा यसविपरीत भएको छ ।