काठमाडौँ — कोशी प्रदेशका मन्त्री रामबहादुर मगर सवार गाडीले जेब्रा क्रसिङमा एक बालिकालाई ठक्कर दियो । ललितपुर महानगरपालिकाको हरिसिद्धिनिर ती बालिकालाई मन्त्रीको गाडीले ठक्कर दिएको थियो ।

बालिका घाइते भइन् तर गाडी रोकिएन । उल्टै दुर्घटनास्थलबाट भाग्नुभयो र त्यसको भिडियो सामाजिक सञ्जाल र समाचारहरूमा हेर्दा अत्यन्त दर्दनाक अनुभूति भयो । राज्यको उच्च तहमा बसेको मान्छेको यस्तो व्यवहार निकै लाजमर्दो र चिन्ताजनक छ । 

गाडीले जानीजानी हान्न खोजेको पक्कै होइन होला तर जेब्रा क्रसिङमा पुगेपछि गति कम गर्नु, सडक छेउमा बच्चा हिँड्दा सावधानी अपनाउनु यी त ‘बेसिक’ ट्राफिक नियम नै हुन् । नहुनुपर्ने दुर्घटना भइहाल्यो ।

तर, त्यसपछिको व्यवहारले मात्र होइन, यसमा संलग्न राजनीतिक नेतृत्वको प्रतिक्रियाले पनि गम्भीर प्रश्न उठाउँछ ।

प्रधानमन्त्री केपी शर्मा ओलीले यो घटनालाई ‘सामान्य रूपमा गाडीले छोयो’ भनेर सामान्यीकरण गर्नु, केवल राजनीतिक सुरक्षाको संकेत मात्र होइन, मानवीय संवेदनाको पूर्ण अभाव देखाउने कदम हो । नेतृत्व भनेको केवल आफ्ना कार्यकर्तालाई बचाउने उपाय खोज्नु होइन, समाजमा मानवीय मूल्य र उदाहरण प्रस्तुत गर्नु हो । 

प्रधानमन्त्रीज्यू, तपाईं देशको अभिभावक हुनुहुन्छ । अभिभावक भन्नाले कानुनका संरक्षक मात्र होइन, हरेक नागरिक– विशेष गरी बालबालिकाप्रति संवेदनशील हुनु, पीडितको सहायता सुनिश्चित गर्नु र जिम्मेवारी स्वीकार गर्नु हो ।

यदि नेतृत्वकर्ताले यस्तो सानो मानवीय कदम लिन नसक्ने हो भने लोकतान्त्रिक राज्यमा दण्डहीनता र सत्ता संरक्षित अपराधको अवस्था बढ्ने निश्चित छ । नेपालको कानुन सबैका लागि बराबर लागू हुनुपर्छ ।

सार्वजनिक पदमा रहेका व्यक्तिले अझ बढी जिम्मेवारी लिनुपर्छ । बालिकालाई ठक्कर दिएर भाग्ने, त्यसलाई सामान्य ठान्ने र शक्तिको छायामा अपराध लुकाउने शैलीलाई कुनै हालतमा पनि सही ठहर्‍याउन सकिन्न ।