‘सीमावर्ती जिल्लामा गुणस्तरहीन मल छ्यापछ्याप्ती’ शीर्षक समाचारले गम्भीर चिन्ता र चासो बढाएको छ ।

जब खेती गर्ने समय हुन्छ, नेपाली बजारमा मलको अभाव हुनु र त्यसपछि किसानले सीमावर्ती क्षेत्रबाट गुणस्तरहीन मल किन्न बाध्य हुनु वर्षौंदेखिको समस्या हो, जुन अहिले पनि यथावत् छ । सरकारको गैरजिम्मेवारीपनले गर्दा किसानले कहिल्यै सुख नपाउने भए । जहिल्यै मारमा पर्ने भए ।

सरकारले मल आयातका लागि कार्यविधि बनाउँदा–बनाउँदै बाली पाक्ने समय आउँछ र किसानको हातमा समयमै मल पुग्दैन । फलस्वरूप, उनीहरूले बाध्य भएर भारतीय सीमावर्ती बजारबाट गुणस्तरहीन र अवैध मल खरिद गर्नुपर्ने अवस्था आउँछ, जसले गर्दा उनीहरूको बाली उत्पादनमा ह्रास आउँछ र किसानले सधैं मर्का भोग्नुपर्छ । यो समस्याको दीर्घकालीन समाधान खोज्नुको सट्टा सरकार रमिते बनिरहेको छ ।