न्यून बजार मागका कारण आर्थिक गतिविधि चलायमान बन्न नसकिरहेका बेला अर्थतन्त्रलाई गति दिन भन्दै राष्ट्र बैंकका गभर्नर विश्वनाथ पौडेलले निकै उदार भएर आगामी आर्थिक वर्षको मौद्रिक नीति सार्वजनिक गरे । यसले बजारमा पुँजी चलायमान हुने विश्वास लिइएको थियो । तर, परिणाम उल्टो देखिँदै छ ।
गभर्नर पौडेलले घरजग्गा, सेयर बजार, कृषि, उद्योगलगायत क्षेत्रमा थप कर्जा विस्तारमा जोड दिएका छन् । उनले भनेजस्तै बैंकहरूले सजिलो तरिकाले उद्यमीलाई ऋण दिए भने सकारात्मक परिणाम आउला । अहिले त बैंकहरूमा पैसा जम्मा गर्न जाँदा होस् या निकाल्दा– ज्यादै दुःख दिइन्छ । आफूले आयआर्जन गरेको पैसा राख्न सजिलोसँग नपाउने अनि आफूले जम्मा गरेको पैसा भनेको बेला सजिलै निकाल्न नपाउने हो भने बैंकको उपादेयता के ?
पछिल्लो समयमा देखिएको समस्या भनेको बैंकमा धितो राखेर कर्जा लिन जाँदा असाध्यै धेरै झमेला बेहोर्नुपर्छ ।
आफ्नो सम्पत्ति बैंकका नाममा राखेर नियमानुसार कर्जा लिन सजिलोसँग पाइँदैन भने बैंकमा किन धाउने भन्ने प्रश्न पनि उब्जिएको छ । अहिले बैंकहरूमा मौज्दात थुप्रिनुको एउटा कारण यो पनि हो । यसप्रति पनि सम्बन्धित निकायको ध्यान जान जरुरी छ ।
–पुरुषोत्तम घिमिरे, जोरपाटी, काठमाडौं
