यसपालि अहिलेसम्म काठमाडौं महानगरपालिकाको बजेट प्रस्तुत हुन सकेको छैन । मेयर बालेन शाह र प्रमुख प्रशासकीय अधिकृत सरोज गुरागाईंबीचको टकरावले यसपालि समयमै बजेट आउन नसकेको हो ।

महानगरको बजेट समयमा नआउँदा केन्द्र सरकार र प्रदेश सरकारलाई कुनै असर नपर्ला तर राजधानीवासीलाई निकै असर पर्छ । राजधानीको रूपरंग र मुहार फेर्ने काममा ठूलो बाधा पुग्छ । यसको जिम्मा कसले लिने ? 

राजधानीका जनताले बालेन शाहलाई भारी मत दिएर मेयरमा निर्वाचित गरेका हुन् । र, उनीप्रति राजधानीवासी आशावादी छन् । बालेनलाई कमजोर पार्नु भनेको राजधानीको विकास निर्माण अवरुद्ध गर्नु हो भन्ने बुझाइ मजस्तै काठमाडौंका आमजनतामा छ । 

अहिले पनि बालेनको काम गर्ने उत्साहमा खासै कमी आएको छैन । हालै विशालबजार, इन्द्रचोकको फुटपाथ फराकिलो पारेर उनले जनताको मन जितेका छन् । राजधानीलाई सफासुग्घर राख्न बालेनले गरेका प्रयास सराहनीय छन् ।