१. यो देशमा स्वास्थ्य क्षेत्रमा सबैभन्दा अन्यायमा कोही परेका छन् भने ती नर्सहरू नै हुन्, जो अहोरात्र काममा खटिँदा पनि कहिल्यै सुखको अनुभूति गर्न पाउन्नन् ।

२.    अहिले नै हाम्रो देशका अस्पतालहरूमा नर्सहरूको अभाव खट्किसकेको छ । भएका नर्सहरू पनि अमेरिका, बेलायत र अस्ट्रेलियातर्फ जाने क्रम जारी छ ।
३.    यही रीतले आगामी ५ देखि ७ वर्षमा हामीले अस्पतालमा नर्सहरूको चरम अभाव भोग्नुपर्ने निश्चित छ । एकातर्फ नयाँनयाँ अस्पताल खोल्ने क्रम जारी हुने, अस्पतालमा बिरामीको चाप बढ्दै जाने र नर्स कम हुने हो भने यो समस्याले विकराल रूप लिने पक्का छ ।
४.    त्यसबेला धेरै रकम तिरेर विदेशी नर्सलाई नेपाल भित्र्याउन नेपाल सरकार बाध्य हुनुपर्नेछ । आफ्ना नर्सलाई सुविधा नदिएर बाहिर जान उत्प्रेरित गर्ने अनि विदेशबाट महँगा नर्स आयात गर्ने परिस्थिति सुखद् होला त मन्त्रीज्यू ?
५.    के तपाईंलाई थाहा छ– यो देशका सरकारी अस्पतालबाहेक अन्य अस्पतालमा काम गर्ने नर्सको पारिश्रमिक कति छ ? तपाईंको सरकारी कार्यालयका नन–गजेटेड सबभन्दा तल्लो तहको कर्मचारीको पारिश्रमिकभन्दा पनि निकै तल छ । अनि, कुन उत्प्रेरणाले उनीहरू काम गरिरहेछन् होला ?
६.    ओपीडी, वार्ड, ओटी, फ्रन्ट डेस्क, वेलनेस, प्याथोलोजी, रेडियोलोजी, कुन ठाउँमा खटिंदैनन् नर्स ? उनीहरूको ड्युटी आवर्सको गणना गर्ने हो भने सरकारी कर्मचारीले गर्ने कामको दोब्बर समय हुन आउँछ । न काम गर्ने ठाउँको सुबिस्ता, न दुई छाक खान पुग्ने तलब, न अतिरिक्त सुविधा, न के न के ?
७.    के तपाईंको मन्त्रालयले नेपालका सबै अस्पतालमा काम गर्ने नर्सहरूको न्यूनतम तलब सरकारी अस्पतालका सरह गर्ने निर्णय गर्न सक्दैन ? कि तपाईं निजी अस्पतालदेखि डराउनुभएको हो ? तपाईंजस्तो स्वास्थ्यमन्त्रीबाट नर्सहरूले ठूलो अपेक्षा गरेका छन् ।
८.    हुनेखाने मान्छेका परिवार निजी अस्पतालमा उपचार गराउन जाने हो । उनीहरूबाट अलिकति बढी रकम थप लिँदा खासै अन्याय हुँदैन । त्यो अतिरिक्त रकम नर्सहरूको पारिश्रमिक र पेसागत विकासमा खर्च गर्न सकिन्छ र उनीहरूलाई न्याय दिन सकिन्छ । तपाईं शिक्षित स्वास्थ्यमन्त्रीलाई यति कुरा सम्झाइरहन नपर्ला ?
९.    यति गर्न सके मात्रै पनि विदेशतिर हुत्तिने नर्सको संख्यामा कटौती हुने निश्चित छ र हाम्रा अस्पतालमा न्यूनतम सही पारिश्रमिक उपलब्ध हुने कुराले उनीहरूलाई यहीं सेवा गर्न उत्प्रेरित गर्नेछ ।
१०.    डाक्टर र नर्सले एउटै टिममा काम गर्नुपर्दछ । पारिश्रमिकका हिसाबले विज्ञ डाक्टरको एक हप्ताको खाजा खर्च पनि नर्सको महिना दिनको पारिश्रमिकभन्दा बढी हुन्छ भने, के नर्सहरूमा हिनताबोध हुँदैन ? अनि उनीहरूबाट तपाईं उत्कृष्ट सेवाको कल्पना कसरी गर्न सक्नुहुन्छ ?