नेपाली विषयको शिक्षक भए पनि गत वर्ष शैक्षिक सत्रको सुरुतिरै कक्षा १० को एउटा सेक्सनमा ‘सामाजिक अध्ययन’ का शिक्षक अनुपस्थित भएका कारण म पढाउन पुगेको थिएँ ।
पाठ्यपुस्तक हेर्ने क्रममा एकाइ एकको ‘हामी र हाम्रो समाज’ अन्तर्गत ‘हाम्रा राष्ट्रिय गौरव’ शीर्षकको पाठ ४ (पृष्ठ १६) पल्टाउन पुगेछु । त्यहाँ सुरुमै लेखिएको थियो:
‘यो नेपाली शिर उचाली संसारमा लम्कन्छ
जुनकिरी झैँ ज्योति बाली अन्धकारमा चम्किन्छ ।
राष्ट्रकवि माधव घिमिरेद्वारा रचित यो हरफले नेपाली गौरवमय वीरगाथालाई प्रतिविम्बित गरेको छ ।...’
गीतका रूपमा बज्ने यस पंक्तिका रचनाकार राष्ट्रकवि माधव घिमिरे नभएर प्रसिद्ध कवि भूपी शेरचन हुन् । प्रतीक र विम्बको प्रयोग गरी अति नै मार्मिक कविता रच्ने क्षमताका धनी शेरचनका कविता हाम्रा विद्यालयका सानो कक्षादेखि ठूलो कक्षासम्म राखिएका छन् । एआईको जमानामा अहिले विश्वका जुनसुकै कुराको पनि जानकारी पाउनु सामान्य भएको छ । कतिपय सिद्धान्त, दर्शन, मतमा विवाद पनि हुन्छ । वैज्ञानिक अनुसन्धानबाट पुष्टि हुन बाँकी कुरामा तर्क–वितर्क चल्न सक्छ । विश्वका कुनै अनौठा मुलुकको अनौठो जानकारी भएमा पहिलो पटक सुन्नेलाई विश्वास नलाग्न पनि सक्छ । तर सामान्य पाठकलाई पनि थाहा भएको, हाम्रै देशका अति लोकप्रिय कविको रचनाका विषयमा पाठ्यक्रम विकास केन्द्रका विज्ञहरूलाई कसरी थाहा भएनछ ! म त छक्क परेँ । तत्कालै पाठ्यक्रम विकास केन्द्रलाई मौखिक सुझाव दिन पनि मन लाग्यो । तर सोचेँ, ‘यो विषय देशभरिका सरकारी विद्यालयमा पढाइ हुन्छ । कैयौं विज्ञ गुरुहरू हुनुहुन्छ । उहाँहरूले सुझाव दिएपछि तुरुन्तै पाठ्यक्रम विकास केन्द्रले सञ्चारका विभिन्न माध्यमको प्रयोग गरी गल्ती सच्याइहाल्छ नि ! मलाई किन हतार !’ तर, प्रथम संस्करण २०८० मा देखिएको यो गल्ती पुनर्मुद्रण २०८१ मा यस पटक हेर्दा पनि यथावत् रहेछ । यो त अति नै भएन र ! आशा छ, यस सम्बन्धमा पाठ्यक्रम विकास केन्द्रले अविलम्ब ध्यान पुर्याउनेछ ।
–इन्द्रकुमार श्रेष्ठ, वागीश्वरी मावि च्याह्मासिंह, भक्तपुर
