‘बाल मन्दिरको जग्गा हिनामिनामा २० जनालाई पक्राउ पुर्जी’ शीर्षकको खबर बाल उत्थानको पवित्र उद्देश्य बोकेर, अनाथ बालबालिका संरक्षण गर्ने दायित्व राखेर खोलिएको नेपाल बाल संगठनमा लामो समयसम्म पदाधिकारी र कर्मचारीले रजगज गर्दै आएको विषयसँग सम्बन्धित छ ।

संगठनको नक्सालस्थित झन्डै २९ रोपनी जग्गामा अनियमितता गरिएको हो । २०४९ मा बृहस्पति विद्यासदनलाई ४ वर्षका लागि भनेर ९ रोपनी जग्गा भाडामा लगाएको बाल संगठनले २०७२ मा सो जग्गालाई बपौती ठान्दै पूरक सम्झौता गरेर भाडा अवधि २१३१ सम्म वढाएको विषयमा जति आलोचना गरे पनि कम हुन्छ । उता बृहस्पतिद्वारा २०७६ सालमा भारतीय बोर्डबाट सञ्चालित राय स्कुललाई मनोमानी ढंगले मन्दिरकै ५ रोपनी जग्गामा सञ्चालन गर्न ५० वर्षका लागि भाडामा दिएर अश्लीलता प्रदर्शन गरिएको थियो । हिनामिना, अनियमितताका अन्य विषय उठाउँदा लिजमा दिएको जग्गाबाट आठ वर्षसम्म बढेको भाडा संगठनले लिन नपाउने कुरा, मन्दिर परिसरको जग्गामा व्यापारीको पेट्रोल पम्प अर्थात् कनक ट्रेडर्ससँग लिइने भाडाबापतको रकम अपारदर्शी भएको देखिन्छ । त्यस्तै संगठनका महासचिवबाट संगठनको जग्गा आफ्नै कम्पनीलाई भाडामा दिएको, पदाधिकारी र कर्मचारीले लिएको रकम फिर्ता नगरेको, ढुक्कसँग व्यापारिक प्रयोजनका लागि १३ रोपनी जग्गा भाडामा दिएको, नीतिनियम कुल्चेर संगठनको गाडी व्यक्तिका नाममा पास गरेकोलगायत सन्दर्भ बेथितिको केही उदाहरण हुन् । यावत् विसंगतिको सिलसिलामा नेपाल बाल संगठनका तत्कालीन अध्यक्ष रीता सिंह वैद्य, बृहस्पति विद्यालय व्यवस्थापन प्रालिका अध्यक्षलगायत २० जनाविरुद्ध अदालतले पक्राउ पुर्जी जारी गरेको हो । वस्तुतः २०४६ को राजनीतिक आन्दोलनपछि सत्तामा पुगेका नेताहरूले आपराधिक गतिविधिमाथि ध्यान नदिँदा सरकारी, सार्वजनिक, व्यक्तिगत जग्गामाथि मनोमानी बढेको र लुटपाट मच्चिएको हो । पूर्वको गिरीबन्धु टी इस्टेट प्रकरणदेखि पश्चिम टीकापुरको जग्गासम्म अनि उपत्यकाका त्रिवि, ललिता निवास, बाल संगठन लगायतका धेरै ठाउँमा भएका आक्रमणले कुशासन उत्कर्षमा पुगेको मान्नुपर्छ । अपराधीमाथि अब पनि कठोर कारबाही गरिएन भने यस्ता निकृष्ट क्रियाकलापले निरन्तरता पाउने निश्चित छ ।