डा. गोविन्द केसीका सहयोगी डा. अमृत जैसीका अनुसार उनलाई मांसपेशी बाउडिने र हिँडडुल गर्न समस्या भइरहेको छ ।
कैलाली — धनगढीमा २४औं सत्याग्रह सुरु गरेका डा. गोविन्द केसीको स्वास्थ्य अवस्था गम्भीर बनेपछि उनलाई सेती प्रादेशिक अस्पतालको लगिएको छ ।
डा. केसीको रगतमा सुगरको मात्रा घटेर ५० पुगेको र रक्तचापमा पनि उतारचढाव देखिएपछि चिकित्सकको सल्लाहमा उनलाई अस्पताल लगिएको हो ।
केसीका सहयोगी डा. अमृत जैसीका अनुसार केसीलाई मांसपेशी बाउडिने र हिँडडुल गर्न समस्या भइरहेको छ । उनलाई अस्पतालमा स्वास्थ्यकर्मीको निगरानीमा राखिने छ ।
डा. केसीविरुद्ध स्थानीय भने विरोध प्रदर्शन गरिरहेका छन् । अनशन स्थलमै पुगेर उनीहरुले तत्काल अनशन तोड्नुपर्ने दबाब दिँदै नाराबाजी गरेका हुन् । सहिद दशरथ चन्द स्वास्थ्य विज्ञान विश्वविद्यालय सञ्चालनमा आउनै लाग्दा डा. केसीलाई प्रयोग गरेर स्वार्थ समूहले अवरोध सिर्जना गर्न खोजेको स्थानीयको आरोप छ ।
चिकित्सा शिक्षा र स्वास्थ्य क्षेत्रको सुधारका लागि आवाज उठाउँदै आएका अभियन्ता डा. केसीले सरकारले विगतका सम्झौता र आफ्ना मागहरूप्रति बेवास्ता गरेको भन्दै बिहीबारदेखि कैलालीको धनगढीमा २४औँ सत्याग्रह सुरु गरेका हुन्।
