हेटौंडा — बागमती प्रदेश सरकारबाट एमालेका मन्त्रीहरुले तत्काल राजीनामा नदिने भएका छन् । एमाले बागमती प्रदेशको सोमबार बसेको संसदीय दलको बैठकले तत्काल सरकारबाट नबाहिरिने र पार्टी केन्द्रीय नेतृत्वको स्पष्ट निर्देशन आएपछि मात्रै थप निर्णय गर्ने निष्कर्ष निकालेको छ ।

यसअघि एमालेले सरकारलाई दिएको समर्थन फिर्ता लिने र सरकारमा रहेका आफ्ना मन्त्रीलाई सामूहिक राजीनामा दिन निर्देशन दिएको थियो । 

काठमाडौंमा बसेको एमाले बागमती प्रदेश संसदीय दलको बैठकले केन्द्रको निर्णय नआएसम्म सरकार नछाड्ने निष्कर्ष निकालेको हो । बैठकमा सहभागी बागमती प्रदेशका विना विभागीय मन्त्री किरण थापाले अहिले सञ्चारमाध्यममा आएका राजीनामाका समाचारमा सत्यता नभएको र पार्टीको आधिकारिक निर्देशन नआएसम्म सरकारबाट नबाहिरिने स्पष्ट पारे । ‘पार्टीको माथिल्लो निकायबाट अहिलेसम्म कुनै निर्देशन आएको छैन । निर्देशन जे आउँछ, त्यही गरिन्छ । सञ्चारमाध्यममा आएका राजीनामाका समाचार केवल हल्ला मात्र हुन्,’ मन्त्री थापाले भने । 

एमाले बागमती प्रदेश संसदीय दलका नेता जगन्नाथ थपलियाले बद्लिदो राष्ट्रिय राजनीतिक परिस्थितिलाई मध्यनजर गर्दै हतारमा निर्णय नगर्ने निष्कर्ष निकालिएको बताए । उनका अनुसार केन्द्रको निर्देशन, अन्य राजनीतिक दलसँगको संवाद तथा विकसित राजनीतिक अवस्थाको मूल्यांकनपछि मात्रै सरकारमा रहने वा बाहिरिनेबारे निर्णय हुनेछ । ‘हरेक दिन राजनीतिक परिस्थिति बदलिइरहेको छ । त्यसैले तत्काल सरकार छाड्ने निर्णय गरिएको छैन । केन्द्र र अन्य दलसंगको संवादपछि मात्रै अन्तिम निर्णय हुन्छ,’ उनले भने । 

बागमती सरकारमा एमालेका ६ जना मन्त्री रहेका छन् । मुख्यमन्त्री ईन्द्रबहादुर बानियाँको नेतृत्वमा हाल प्रदेशमा रहेका १४ मन्त्रालयलाई ८ कायम गरिएको छ । साउन १ बाट उक्त निर्णय कार्यान्वयन गर्दै ८ मन्त्रीलाई जिम्मेवारी दिइएको छ भने ६ मन्त्रीलाई विनाविभागीय राखिएको छ ।