बारा — रोपाइँको बेला छ । अहिले आफ्नै खेतबारीमा रोपाइँमा व्यस्त हुनुपर्ने समय हो । जसको खेतबारी छैन, तिनीहरूलाई पनि मेलापातको चटारो लाग्छ । तर, ती सबै छाडेर अहिले मिटरब्याजपीडितहरू आन्दोलित बनेका छन् ।

तिनीहरू रोपाईं बिर्सेर आन्दोलनमा व्यस्त हुँदै चार दिनदेखि निजगढमा बसेका हुन् । गएको सोमबारदेखि उनीहरू यहीँ छन् । रोपाइँ छाडेर सातादेखि आन्दोलित हुँदै घर–परिवार छाडेर बसेका उनीहरूको मन भने खुसी देखिँदैन । एकातिर खेतीपातीको चटारो र अर्कोतिर सरकारले माग पूरा गर्ला कि नगर्ला भन्ने चिन्ताले उनीहरूलाई सताइरहेको छ । कतिपयलाई खेतीपातीको चटारोले छोए पनि त्यसको परवाह नगरी आन्दोलित भइरहेका छन् । कतिपय आन्दोलनकारी भने धान रापाइँको हतार भएर घर फर्केका छन् । 

झन्डै २ सय आन्दोलनकारी अहिले निजगढमा बसेका छन् । असार २५ गतेदेखि पैदल यात्रा गर्दै मधेश प्रदेशका ८ जिल्लाका ४ जिल्ला कटेर पाँचौं जिल्ला बाराको निजगढमा चार दिनदेखि उनीहरू बसेका हुन् । उनीहरूको गन्तव्य थियो– काठमाडौंसम्म पैदल पुगेर सरकारलाई आफ्ना समस्या सुनाउने । तर गृहमन्त्री सुधन गुरुङ गत मंगलबार नै राजधानी काठमाडौंको प्रशासनिक केन्द्र सिंहदरबार छाडेर सुटुक्क निजगढ आइपुगे । त्यही भएर आन्दोलनकारीहरू गन्तव्यमा नपुग्दै गत सोमबार रातीदेखि निजगढको उद्योग वाणिज्य संघको सभा हलमा उकुसमुकुस गरेर रात र दिन गुजारिरहेका छन् । 

त्यहाँ ३ वटा साना  शौचालय छन् । एउटा सानो जस्ताले छाएको ट्रस्ट छ, त्यसमा खाना पकाउँदै खाँदै बसेका छन् । बिजुलीबत्तीसहित पंखाहरूको सुविधा छ । त्यसैलाई प्रयोग गरी सयौं महिला र पुरुष आन्दोलनकारी भुईंमा सुतेर रात र दिन काटेका छन् । सबै आन्दोलनकारी एउटै हलमा कोचाकोच भएर बसेका छन् । सामूहिक खाना पकाउँदै खाएका छन् । सरकारविरुद्ध नारा घन्काएका छन् । दुई दिन झन्डै १० घण्टा तिनीहरूसित बिताएका गृहमन्त्री गुरुङलाई आफ्ना पीडा सुनाउँदै बसे ।

सरकारसित वार्ता गर्ने भनेर मन्त्री गुरुङको साथमा गएका आन्दोलन समितिका अध्यक्ष अवधेश कुसवाहसहित ६ सदस्यीय टोली काठमाडौं गए पनि सरकारले आफ्ना ६ बुँदे माग सम्बोधन गर्ने आशमा आफ्ना पक्षका वार्ता टोलीलाई बिदाइ गर्दै अहिले पनि कतिपय पीडित यहीं बसेको निजगढ उद्योग वाणिज्य संघका अध्यक्ष दीपेन्द्र श्रेष्ठले बताए । उनका अनुसार पहिला पनि तिनीहरू मार्च पासका क्रममा यहीँ बसेका थिए ।