काठमाडौं — विशेष अदालतले नेपाल टेलिकमका पूर्वप्रबन्ध निर्देशक सुनिल पौडेललाई अकुत सम्पत्ति आर्जनसम्बन्धी मुद्दामा साढे ८ वर्ष कैदको फैसला सुनाएको छ । 

विशेष अदालतका न्यायाधीशहरू सुर्दशनदेव भट्ट, हेमन्त रावल र डिल्लीरत्न श्रेष्ठको इजलासले सजाय निर्धारण गर्दै अकुत सम्पत्ति आर्जनमा ८ वर्ष र कार्यकारी पदमा रहेको रुपमा थप ६ महिना कैदको फैसला सुनाएको हो ।

विशेषले १ करोड ५४ लाख २५ हजार २ सय जरिवाना भराउने फैसला पनि सुनाएको छ । त्यसैगरी अपराध पीडित संरक्षण ऐन, २०७५ को दफा ४१ (३) बमोजिम जनही ६ लाख १७ हजार असुल गरी पीडित राहत कोषमा जम्मा गर्ने समेत ठहर विशेषले गरेको छ । पौडेलसँगै विशेषले दीपक आनन्दलाई पनि सोही बराबर कैद र जरिवाना हुने निर्णय सुनाएको छ । उनले पौडेलले गैरकानुनी रुपमा आर्जन गरेको सम्पत्ति लुकाउने कार्य गरेका थिए ।

मंगलबार पौडेल दोषी ठहर भएका थिए भने सजाय निर्धारण विहिबारमात्र गरेको हो । मंगलबार विशेषले घुसको मुद्दासहित साढे १५ करोड रुपैयाँ भ्रष्टाचार गरेको ठहर गरेको थियो । घुस लेनदेनमा विशेषले सोही दिन साढे २ वर्ष कैदको फैसला पनि सुनाएको थियो । विशेषले घुस मुद्दामा  १२ करोड ७५ लाख ७० हजार  ठहर गरेको थियो । 

दुवै मुद्दामा सुनिल पौडेलले सिंगापुरस्थित विभिन्न बैंकबाट आर्थिक कारोबार गरेको अख्तियार दुरुपयोग अनुसन्धान आयोगको दाबी थियो । 

अख्तियारले पौडेलको घरबाट उपकरण बरामद गर्ने क्रममा सिंगापुरबाट कारोबार भएको विवरण खुलेपछि अकुत सम्पत्तिसँगै घुसको पनि अभियोगपत्र पेस गरेको थियो । सिंगापुर बैंकमै रकम लुकाएको आरोपमा उनी गैरकानुनी सम्पत्तिआर्जनको मुद्दामा समेत दोषी ठहर भएका हुन् ।