निजगढ — मिटरब्याजपीडित र गृहमन्त्री सुधन गुरुङबीच बाराको निजगढमा झन्डै ५ घण्टा भएको वार्ता बिनानिष्कर्ष सकिएको छ । 

उद्योग वाणिज्य संघको भवनमा भएको वार्ता टुंगोमा पुग्न नसकेको हो । आन्दोलनमा सहभागी संयुक्त जनअधिकार मोर्चा नेपालका संयोजक निर्ग नवीनका अनुसार मिटरब्याजसम्बन्धित यसअघि बनेका गौरीबहादुर कार्की, तेजबहादुर कार्की र बाबुराम रेग्मी नेतृत्वको आयोगका प्रतिवेदन सार्वजनिक गर्न माग गरेको बताए । उनले भने, 'प्रतिवेदनहरु सार्वजनिक नभएसम्म सहमति जुट्दैन ।' उनले आफूहरुको मागका सम्बन्धमा गृह मन्त्रालयको तयारी नदेखिएको आरोप समेत लगाए ।   

यस्तै मिटरब्याज पीडित अभियन्ता लक्ष्मी घिमिरेले मिटरब्याज समस्या समाधानका लागि प्रस्तुत ६ बुँदे मागमाथि प्रधानमन्त्री कार्यालयमा उच्चस्तरीय छलफल भइरहेको जानकारी दिइन् । मिटरब्याजसँग सम्बन्धित फर्जी तमसुक, दृष्टिबन्धक, रजिस्ट्रेसन तथा चेकलगायतका लिखत खारेज, प्रभावकारी कानुन निर्माण, विशेष न्यायाधिकरण गठन र विगतका सम्झौता कार्यान्वयनलगायत ६ बुँदे आफूहरुहरुको माग रहेको अभियन्ता घिमिरले बताइन् । ‘आज भएको वार्तामा कुनै लिखित सहमति भएन । विगतको आयोगको प्रतिवेदन आजै सार्वजनिक गर्ने भन्ने गृहमन्त्रीले आश्वासन दिनुभएको छ,’ उनले भनिन्, ‘हाम्रो ६ बुँदे माग सम्बोधन भयो भने हामी भोलि नै मार्च रोक्छौं, हैन भने बिहानै राजधानी लाग्छौं । सम्भवत: आजै राति केही निर्णय आउला ।’