काठमाडौँ — भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावलले सुकुमवासीका समस्यालाई सरकारले प्राथमिकतामा राखेको बताएकी छन् ।

आइतबार गृहमन्त्री सुदन गुरुङ लगायतको टोलीसँगै बोडेस्थित होल्डिङ सेन्टरमा पुगेकी मन्त्री रावलले सुकुमवासीलाई लालपूजा दिनुपर्छ भनेरै अव्यवस्थित बसोबासी स्थलबाट सारेर होल्डिङ सेन्टरमा राखिएको बताइन् ।

'सुकुमवासीलाई अब लालपुर्जा दिनुपर्छ भनेर सरकारले कदम चालेको हो । सरकार लागि परेको छ,' उनले भनिन्, 'असारको तेस्रो हप्ताबाट बर्दियाबाट लालपुर्जा वितरण सुरु भइसकेको । यो केही हप्तामै देशैभरि लागू हुन्छ ।'

सुकुमवासीलाई जग्गा, लालपुर्जा दिनलाई कानुनी प्रक्रिया रहेको उनले बताइन् । 'इमोसनल भएर हचुवाको भरमा लालपुर्जा दिँदा त्यो अवस्थित हुन्छ । सरकारले जतिसक्दो काम सुरु गरिसकेको छ । तपाईँहरु भएका ठाउँमा सरकारी टोली आएर विवरण उठाउने छ ।'